Lezoko II. Antzerki Testu Laburren Lehiaketaren sei finalisten berri eman dute
Ainhoa Mariezkurrena sanjuandarra, Jokin Oregi, Hegoa Alvarez, Galder Perez, Goiz Eder Iturain eta Pedro Jose Zabalza dira testu horien egileak.
Honakoak dira sei finalistak. Sei finalista. Horien bila hazi ziren Lezoko II. Antzerki Testu Laburren Lehiaketaren epaimahaiko kideak hilaren 6an, sariketa horren barruko lanak entregatzeko epea bukatu zen egunean. Osotara 20 testu jaso zituzten, iaz baino hiru gehiago. Araudiarekin zorrotz, jada sei finalistak aukeratu dituzte, haiek emandako lanak iruditu zaizkie egokienak: Ainhoa Mariezkurrena sanjuandarra, Jokin Oregi, Hegoa Alvarez, Galder Perez, Goiz Eder Iturain eta Pedro Jose Zabalza dira egileak. Gaur eman du erabakiaren berri Hika Teatrok, Lezoko Udalarekin batera bigarrenez egitasmoa antolatu duen antzerki konpainiak.
Aurrerago emango dituzte antolatzaileek xehetasun gehiago, bai sariketarena, bai eta egile horien lanak oinarri izango dituen Lezoko II. Irakurketa Dramatizatuen Partidarena, hau da, finalisten artean lanik onena herri bozketa bidez zein den aukeratzeko urriaren 5ean egingo duten kale-antzerki jaialdiarena. Edonola ere, urriaren 5eko ate eszenikoen jaialdi horretarako pistak apurka jendarteratzen hasi dira. Adibidez, gaur Lezoko Udalak udazkeneko kultur programazioa aurkezteko egindako prentsaurrekoan banatu den materialaren artean, urriaren 5eko 19:30etik aurrera Lezo Herri Eskolako jolastoki estalian zer gertatu baino, gauzak nork gertaraziko dituen jakinarazi dute: Ainhoa Artetxe, Josune Velez de Mendizabal eta Joseba Apaolaza aktore profesionalak, eta Naiara Bergez, Edurne Agirrezabala eta Xumai Gorostiaga aktore amateurrak arduratuko dira sei finalista horien lanen irakurketa dramatizatua egiteaz. Irakurketa horiek prestatzeko Amancay Gaztañaga, Ximun Fuchs eta Patricia Urrutia zuzendarien laguntza izango dute.
Urriaren 5erako elementu gehiago: Iñaki Salvador musikariak eta Mad Muasel eta Big Sound DJek lagunduko dituzte aktoreak. Horiek denak aurkezten, beraz den-dena bideratuko dutenak, Miren Gaztañaga eta Xanti Agirrezabala izango dira.
Lierni Fresnedo, Oier Guillan eta Agurtzane Intxaurraga izan dira Lezoko II. Antzerki Testu Laburren Lehiaketaren epaimahaiako kideak, haiek aukeratu dituzte sei finalistak. Orain, urriaren 5ean, herritarrei dagokie zein lan iruditzen zaien onena erabakitzea. Aurrerago emango ditu HITZAk gai horren gaineko zehaztasun gehiago.
