Bazen behin liburutegi bat
Oiartzungo liburutegia eraldatzeko prozesu parte hartzailea jarri dute martxan udalak eta Ku-ku elkarteak, eta herritarrei horren berri emate aldera aurkezpena egingo dute gaur.
Oiartzungo herritarrek behar duten liburutegi eredua modu kolektiboan birpentsatu eta diseinatzeko prozesua jarriko dute martxan udalak eta Ku-ku Haur eta Gazte Literatur Ekimenak. Bazen behin liburutegi bat deitu diote gogoeta eta eraldaketa proiektuari.
Espazio imajinatua eraikitzeko herri prozesua diseinatu dute, egungo liburutegiaren funtzio, zerbitzu eta espazioak ikuspegi komunitarioago batetik formulatu, biblioteka eragile komunitario eta azpiegitura sozial gisa ulertu, eta askotariko herritarren beharretara eta prozesu sozial eta kulturalen zerbitzura egongo den egitasmoa izateko. Hamar hilabeteko lanketa parte hartzailea egingo dute irailetik ekainera. Metodologia eta parte hartzeko bideak askotarikoak nahiz egoera eta kolektibo bakoitzari egokituak izango dira, eta horretarako elkarrizketa sakonak, espezifikoak, informalak, taldekoak, bakarkakoak nahiz hainbat galdetegi baliatuko dira.
Hilabete bakoitzean sektore, eragile edo kolektibo zehatz batzuengana zuzenduko dira, ziurtatzeko herriko aniztasuna ordezkatzeko adina ahots eta ikuspegi biltzen dituztela. Bereziki erdigunean kokatu nahi dituzte kolektibo zaurgarrienak; liburutegiaren erabiltzaile potentzialak direnak; eta prozesuko ohiko deialdietan bestela parte hartuko ez luketenak izan hizkuntzagatik, ordutegiagatik edota halako markoen ezaugarriengatik.
Adarretako hizka-mizka horiez gain, hiru hilabetean behin eztabaida enborrak izango diren herri ezbaiak egingo dira liburutegian: orokorragoak izango dira, eta liburutegiaren nahiz prozesuaren gaineko ikuspegi zabal bat eskainiko dute.
Karmele Mitxelena Ku-ku elkarteko kidea da, eta azaldu duenez urtean zehar, herrian, haur literaturari lotutako ekintzak antolatzen saiatzen dira. “Oiartzungo liburutegiaren harira, gure kezka zen ikusten genuela ez zela biblioteka gure herriko haurren beharretara egokitzen. Gu izan ginen apur bat hau dena piztu zutenak”. Ildo horretatik, argi dauka helburua Mitxelenak: “Helburua da hausnarketa komunitario bat egitea herrian zehazteko zein diren gure herriko liburutegiak bete behar dituen funtzioak, betekizun horiek joan daitezen gure komunitatearen beharretara egokituta”. Mitxelenaren arabera, azken urteetan aldatu egin da liburutegiaren kontzeptua, eta hain justu, prozesu horren bidez jakin nahi dute zer den zehazki herritarrek nahi dutena: “Herriaren barruan ahotsa eman nahi diegu kolektibo ezberdinei. Saiatu nahi dugu guztiei leku bat ematen”.
Prozesuaren aurkezpena, gaur
Prozesua koordinatzeko talde motor bat osatu dute udalak, Ku-ku eragileak, Juntura arkitektoen kooperatibak eta Aise prozesuen fazilitaziorako kooperatibak. Talde motorrarekin lehen geruza izeneko markoa arituko da, prozesuaren kalitatea eta ordezkaritza zabala bermatu eta sektore edo eragilekako eztabaiden eta galdeketen artikulazio eta dinamizazio lana egiteko. Prozesuaren aurkezpen publikoa gaur egingo dute, 19:00etan, Arizmendienean.
