Martxan dira Pasaiako hiru gaztelekuak
Joan den astean zabaldu zituzten ateak hiru guneek. 13-17 urte bitarteko pasaitarrek "lagunekin egoteko eta esperientzia berriak partekatzeko" aukera dute jada.
Pasaiako hiru gaztelekuak martxan dira joan den astetik, nerabe eta gaztetxoz betetzen hasi dira. Ekainera bitarte zabalik izango dira hiru guneak: Trintxerpe-San Pedro, Donibane eta Antxokoak. Hauetan, 13-17 urte bitarteko pasaitarrek “lagunekin egoteko eta esperientzia berriak partekatzeko” aukera izango dute. Alboan bi hezitzaile izango dituzte, udaleko iturrien arabera, “bide lagun izan, haiei entzun eta laguntzeko, haien proposamen, zalantzei eta beharrei erantzuteko”.
Julen Rodriguez Haur, Nerabe eta Gazteria saileko zinegotziak aipatu du gaztelekuak “elkartzeko guneak” direla: “kuadrillan egoteko lekuak, beste gazte batzuk ezagutzeko, gozatzeko eta elkarrekin hainbat plan egiteko guneak”. Bertan askotariko jarduerak egingo dituztela azaldu du udal ordezkariak: talde jolasak, futbolina, ping-ponga, sukaldaritza, serigrafia, komikiak eta aldizkariak irakurtzeko txokoa, musika entzuteko txokoa, irteerak… Iaz, esaterako, Pirinioetara eta Port Aventurara bidaia bana antolatu zituzten.
Azken urteetan hiru espazioek “harrera oso ona” izan dutela gaineratu du Rodriguezek: “beste udalerri batzuen aldean oso erabilera indize altua daukate, eta hori pozgarria da. Horrek bultzatzen gaitu ekipamenduen hobekuntza eta aukera berriak mahai gainean jartzera, eta horretan dihardugu departamentuan. Helburua zerbitzua zabaltzea izango da”, erantsi du zinegotziak.
Honako ordutegia dute gaztelekuek: ostegunetan 18:00etatik 20:00etara eta ostiral eta larunbatetan 17:00etatik 21:00etara.
