Berritasunekin dator bigarren Lezoko Irakurketa Dramatizatuen Partida
Larunbatean jokatuko dute Lezoko Antzerki Testu Laburren Lehiaketaren final handia. Sei finalista lehiatuko dira, horien artean Oarsoaldeko bat.
Val, Legorburu, Intxaurraga eta Guillan, gaurko agerraldian. Lehen edizioko arrakastak bultzatuta, bigarren Lezoko Antzerki Testu Laburren Lehiaketa egitea erabaki dute Lezoko Udalak eta Hika Teatroa konpainiak. Larunbat honetan (hilak 5) izango da bigarren horren final handia (Lezoko II. Irakurketa Dramatizatuen Partida), Lezo Herri Eskolako patioan. Lehiaketa bat baino gehiago, larunbatekoa “festa” izango dela iragarri dute gaurko aurkezpenean Xanti Val teknikariak, Jon Legorburu zinegotziak, Hika Teatroa-ko Agurtzane Intxaurragak eta Oier Guillan idazle, zuzendari eta dramaturgoak. Berritasunak izango direla jakinarazi dute.
Jon Legorburuk, udalaren izenean, bigarren ekitaldia jasotzea “ohore” bat dela esan du: “Pasa den urtean antzerki festa bikain bat bizi izan genuen, guretzako sorpresa polita izan zen, oso hunkigarria. Herri txikia izanik guretzako plazera da horrelako ekitaldi bereziak egitea Lezon, gauzak egiten jarraitzeko indarrak ematen dizkigu honek. Uste dugu kalitate aparteko testuak direla aurtengoak. Guretzako ohore bat da”. Iaz 400 bat lagun bertaratu zirela erantsi du, eta aurten kopuru hori handitu nahi dutela. 900 metro koadroko patio hori lepo ikusi nahi dute antolatzaileek.
Programa “kalitatezkoa” izango dela gaineratu du zinegotziak. Ekitaldia biribiltzeko, hainbat zuzendari eta aktore famatu bertan izango dira, irakurle zein aktore lanak egiten. Finalistek Amancay Gaztañaga, Ximun Fuchs, Patricia Urria eta Agurtzane Intxaurraga zuzendariekin irakurri beharreko testuak prestatuko dituzte. Gero, Naiara Bergez, Edurne Agirrezabala, Xumai Gorostiaga, Sandra Fernandez Aguirre eta Patxi Perez aktoreek irakurle lanak egingo dituzte.
Koska bat gora egin dute antolatzaileek aurtengo edizioan. Iaz 8 lan aurkeztu baziren, aurten 20 izan baitira, horietatik bi Lezokoak. Horien artean dagoeneko aukeratu dituzte larunbatean lehian ariko diren sei finalistak: Ainhoa Mariezkurrena sanjuandarra, Jokin Oregi, Hegoa Alvarez, Galder Perez, Goiz Eder Iturain eta Pedro Jose Zabalza. Oier Guillanek epaile lanak egin ditu, eta onartu du “kalitate handiko” lanak aurkeztu direla. “Zailtasunak izan baditugu ere 20tik 6 aukeratzeko, pozgarria izan da ere antzerkigintzaren kalitatea zer nolakoa den ikustea. Poza ematen du ikustea aurkeztu direnak antzerkia idazteko joera indartsuari eusten diotela, belaunaldi berrien ahotsa entzutea eta idazkera berriak irakurtzea”.
Ikusleek ere paper garrantzitsua jokatuko dute larunbatean, haiek aukeratuko baitute aurtengo lanik onena. Emanaldiaren hasieran botoa emateko orri bana jasoko dute ikusleek. Boto bakoitzak zozketa batean parte hartzeko aukera emango die bertaratutakoei, eta denen artean sari interesgarriak zozkatuko dituzte: 100 euroko kultura bonua, afari baterako txartela eta Gezalarako urteko bonua.
19:30ean abiatuko dute aurtengo partida, Iñaki Salvadorrek, Mad Muasel taldeak eta Big Sound DJak girotuko dute arratsalde-ilunabarra. 20:00etan hiru antzerki obren irakurketa dramatizatua egingo dute. 21:15ean afarirako tartea izango da (horretarako foodtruck zerbitzua izango da aurten). Sabelak ongi bete ondoren, 21:45ean, gainerako hiru antzerki finalisten obren irakurketa egingo dute. 23:00etan bozkatzeko unea izango da eta jarraian sari banaketa egingo dute.
Lezora joateko asmoa dutenei garraio publikoa erabiltzera gonbidatu dituzte antolatzaileek.
