Hunkituta inauguratu dute Beloaga oiartzuarrek
Hiru fasetan egin dituzte Beloaga berreskuratzeko lanak, eta azken fasea amaituta, inaugurazioa egin zuten larunbatean.
Beloaga gaztelua inauguratu zuten pasa den larunbatean (hilak 5), eta antolatzaileek espero zutena baino arrakastatsuagoa izan zen ekitaldia. Ibon Mitxelena izan zen udalaren izenean hitza hartu zuena, eta kontatu du eguna sinplea izan bazen ere, oso hunkigarria izan zela: “Eguraldiak lagundu zigun, eta uste genuena baino askoz jende gehiago etorri zen. Ekitaldira Beloaga Bizirik elkarteko kideak, Gurutze auzokoak… bertaratu ziren. Espero genuen jendearen bikoitza etorri zen; 60-70 pertsona artean elkartu ginen”.
Azken urteetan Beloaga Bizirik eta Oiartzungo Udala bailara bostehun bat urtez babestu zuen Erdi Aroko gaztelua berreskuratzeko lanetan ibili dira, eta balioan jarri zuten hori pasa den asteburuan.
12:00etan elkartu ziren Gurutzeko plazan, eta bertatik abiatu zuten gaztelurako bidea, elkarrekin. Eszenatoki nagusira iritsi zirenean Beloaga Bizirik-eko Joxe Mari Iturriotzek kontatu zuen gazteluaren historia. Gero, Jose Etxezurietak Beloaga Bizirik elkartearen bidea azaldu zuen. Mitxelena izan zen hurrena. Goiza Soinueneako kideek girotu zuten, eta Bizardian egin zuten hamaiketakoarekin amaitu zuten.
Gipuzkoan kontserbatzen den gaztelu garrantzitsuenetakoa da Beloaga; Euskal Herriko historiaren lekuko izan dira eraikinaren hormak. 1200. urteko Nafarroako konkista; karlisten garaia eta 1936ko guda bizi izan ditu gazteluak, besteak beste. 2016an Kultur ondasun izendatu zuen Eusko Jaurlaritzak.
2010ean hasi ziren Beloaga Bizirik elkarteko bolondresak gotorlekuaren aztarnak eta memoria historikoa berreskuratzen, auzolanean. 2015ean sinatu zuten hitzarmena Oiartzungo Udalak, Beloaga Bizirik taldeak eta Aranzadik gaztelua berreraikitzeko proiektua martxan jartzeko, eta hiru fasetan egin dute: lehenengoan dorre nagusiaren hormak konpondu zituzten; bigarrenenean arma plazako paretak eta hirugarrenean gaztelura joateko irisgarritasuna hobetu dute.
Azken fase horretan dorre nagusira igotzeko eskailerak egin eta plataforma bat ezarri dute. Gainera, panel informatiboak ere jarri dituzte bertan gertatutakoa kontatzeko. Inguruko txoko garrantzitsuak ere markatu dituzte karteletan: mairubaratzak, Andrearriagako hilarria, Arkaleko Behatokia, Langile Bataloien barrakoiak…
Jarraian, ekitaldian ateratako zenbait argazki:
