Seme-alaben ikasketa prozesuan euskarak duen garrantziaz jabetzeko, hitzaldi sorta
Udalak eta Bokalek elkarlanean antolatutako hitzaldien helburua gurasoak "sentsibilizatu eta prestatzea" da. Euskaraz eta gaztelaniaz izango dira.
Haur eta gurasoek elkarrekin egoteko tokia izango dute Pasaiako Udalak eta Bokalek hitzaldi sorta interesgarria antolatu du datozen asteetarako. Orotara, bost hitzaldi izango dira urri eta azaroa bitartean. Hauek, antolatzaileen arabera, “seme-alaben ikasketa prozesuan euskarak duen garrantziaz jabetzeko eta laguntza eskaintzeko” asmoz antolatu dira, bereziki gurasoei begira. Ebete elkateko Iñaki Eizmendi eta Maddalen Aristegi izango dira hizlariak.
Euren seme-alaben ikasketa prozesuan euskarak duen garrantziaz jabetzeko gurasoak “sentsibilizatu eta prestatu” nahi dituzte hitzaldiekin, eta “prozesu horretan nola agun dezaketen” ere ikasiko dute.
Euskaraz eta gaztelaniaz izango dira hitzaldiak. Euskarazkoa hiru bider errepikatuko dute. Gure seme-alabei euskararekin eta hizkuntzekin laguntzearen erronka titulupean egingo dute, hilaren 15ean (asteartea da) Trintxerpeko Karmengo Ama ikastetxean (16:45ean), azaroaren 6an (asteazkena da) Antxoko Pasaia Lezo lizeoan (17:00etan) eta azaroaren 13an (asteazkena da) Donibaneko Pasaia Lezo lizeoan (16:45ean).
Gaztelaniaz, berriz, bi hitzaldi izango dira. Lehenak Disfrutando de los idiomas. ¿Cómo ayudar a nuestros/nuestras hijos/hijas con los idiomas y estudios? titulua eramango du eta urriaren 22an (asteartea) egingo dute, Trintxerpeko Karmengo Ama ikastetxean (16:45ean). Bigarrena, berriz, Propuestas para jugar en euskera con nuestros hijos e hijas en casa izenekoa da, hilaren 29an (asteartea da) izango da, 17:00etan, Antxoko La Anunciata ikastetxean.
Aldez aurretik izena eman beharko dela gogorarazi dute udalak eta Bokalek. Udalaren webgunean egin daiteke, lotura honetan.
