'Altxa Burua' sortu dute teknologiaren erabilera egokia bultzatzeko
Gazteek mugikorraz egiten duten erabileraz arduratuta daudelako sortu dute taldea. Leku ezberdinetako telefonoak erabiltzeko aukera izango da.
Altxa Burua Oiartzun taldea sortu dute haur eta gazteek mugikorraz egiten duten erabileraz arduratuta dauden hamarnaka guraso oiartzuarrek. Teknologiaren erabilera egokia bultzatu nahi du taldeak, eta haur eta gazteei interneterako sarrera duten gailuak ematea aztertzea, ikastetxeak telefono mugikorrik gabeko arnasgune bihurtzea edota helduak eta seme alabak erabilera egokian trebatzea lortu nahi dute, besteak beste.
“Lehenengo mugikorra hamasei urterekin izatea gomendatzen dute adituek, baina gaur egun haur eta nerabeek askoz ere lehenago eskuratzen dute bat. Non dauden jakiteko, zerbait gertatzen bada etxera deitu ahal izateko, lagunek dagoeneko badutelako edo beste hainbat arrazoi tarteko, geroz eta ohikoagoa da hamabi, hamar edo zortzi urteko haurrak kalean eta ikastetxeetan mugikorrarekin ikustea”.
Mugikorra goizegi erosteko arrazoiak aldatu nahi ditu Altxa Buruak, eta udalarekin eta herriko merkatariekin batera martxan jarri duten lehen ekimena aurkeztu zuten pasa den ostiralean: herriko hainbat komertzio, taberna eta udal eraikinetako telefonoak haur eta gazteen eskura jarri dituzte behar dutenean eta azalpenik eman gabe erabili ditzaten. Guria ibili posible zu leloa duen pegatina berde batekin identifikatu daitezke leku horiek. 200 baino gehiago dira dagoeneko, eta telefono sarea zabaltzeko lanean jarraitzen dute.
Talde sortu berriak, bestalde, helduei ere luzatu diete eskaera: “Animatu, lotsarik gabe, behar duten unean pegatina ikusten duten komertzioetan telefonoa eskatzera. Deitzeko aukera bermatuta, mugikorra erosteko arrazoi bat gutxiago izango dugu”.
Gaiaren inguruan zalantzaren bat duten herritarrek edo ekimenean parte hartu nahi duten establezimenduek helbide honetara idatzi dezakete.
