PSE-EE, "pozik" Gaintxurizketako neurriekin
Gipuzkoako Foru Aldundiak iragarri du Gi-636 errepidean bide eta oinezkoen segurtasuna bermatzeko behin-behineko neurriak hartuko dituela.
Lezoko PSE-EE “pozik” da Gipuzkoako Foru Aldundiak Gi-636 errepidean, Gaintxurizketan, bide eta oinezkoen segurtasuna bermatzeko behin-behineko neurriak hartuko dituela iragarri duelako. Eremu horretan aldi baterako pasabide bat jarriko da, oinezkoek errepidea segurtasunez gurutzatzeko. Horrez gain, espazio seguru bat egokituko da, Salva eta Perrene enpresaren eremuan oinezkoentzako sarbidea errazteko. Neurri horrekin inguruko bizilagunen “eskaera historikoari” erantzuten zaiola adierazi du alderdi sozialistak.
Joxean Sanchez udal bozeramaileak jakinarazi du PSE-EEk konpromisoa hartuko duela Lezoko Udalarekin eta aldundiarekin batera “eskuz esku” lanean jarraitzeko, behin-behineko zein behin betiko neurriak “ahalik eta lasterren” ezartzeko eta Gi-636 errepidea “Gipuzkoako errepideen puntu beltza” izateari uzteko. Horrez gain, Sanchezek bizilagunen inplikazioa balioan jarri du, pairatzen duten arazoa “agenda publikoaren lehen lerrora” eramaten jakin dutelako.
