Frankismoak errepresaliatutako emakume oiartzuarren bizipenak jasotzeko ikerketa abiatu dute
Gerran eta frankismoan emakume oiartzuarrek izan zituzten bizi baldintza gogorrak dokumentatu nahi ditu Aranzadik proiektu berri honekin.
Oiartzungo Udalak bultzatuta, 1936tik 1978ra Oiartzunen giza eskubideen urraketak, errepresioa eta motibazio politikoko beste indarkeria batzuk jasan zituzten emakumeen historia berreskuratzen hasiko da Aranzadi Zientzia Elkartea.
Gerra eta diktadura frankistako lehen ikerketak, nagusiki, bataila handietan eta liderren historiaren kontakizunetan oinarritu ziren. Zenbait emakumek gerran edota frankismoko kartzeletan bizitu zituzten egoerak ere jaso zituzten liburu ezberdinetan, 70-80ko hamarkadetan. Dena den, isilpean gelditu dira gertaera gehienak, edo ahoz aho kontatu diren arren, ez dira ikertu eta idatziz jaso. Orain 10-15 urte hasi ziren garai horretan espezializatutako ikerlariak, metodologia zientifikoaren bidez eta genero ikuspegia aplikatuz, emakumeek 1936-1978 bitartean izan zuten papera eta sufritu zituzten egoerak ikertzen. Oiartzunen, Kattin Txiki urte luzez ibili da memoria historia berreskuratzeko lana burutzen.
Hasitako bidean sakondu eta gerran eta frankismoan emakume oiartzuarrek izan zituzten bizi-baldintza gogorrak dokumentatu nahi ditu Aranzadik proiektu berri honekin: kartzelako egoera penagarriak, ile mozketak, umiliazioak, bortxaketak, erbeste behartua, gerra kontseiluak… Estalitako historiaren parte hori erakusteko egingo dute ikerketa, emakume oiartzuar guztiei izen abizenak jarri eta beraien memoria berreskuratzeko.
Oiartzuarren ekarpena eskatu dute
Ione Zuloaga Aranzadi Zientzia Elkarteko historialariak egingo du ikerketa, eta, besteak beste, lanaren nondik norakoak azaltzeko Emakumeen aurkako errepresio frankista gerra garaian eta gerra ostean (1936 – 1945) hitzaldia emango du hilaren 23an. Hitzaldia 18:00etan hasiko da, eta pleno aretoan izango da.
Oiartzuarren ekarpena ezinbestekoa izango dela azaldu dute, “familiartean gelditu izan diren kontakizunak” izango baitira ikerketaren abiapuntua. Horregatik, herritarrak animatu dituzte aurkezpenera joatera eta etxeko edo gertukoengandik iritsi zaizkien gertaerak, bizipenak edo argazkiak partekatzera.
Zuloaga ikerlariarekin harremanetan jartzeko bideak ere eskura jarri dituzte, helbide honetara idatzita edo 943 46 61 42 zenbakira deituta.
