Aurtengo Hitzen Lihoan gorputza izango da elementu nagusia
Azaroaren 4tik 10era izango da Hitzen Lihoaren zazpigarren edizioa, eta 'gorputza' ardatz hartuta, astebeteko egitaraua osatu dute.
Hitzen Lihoaren zazpigarren edizioa azaroaren 4tik 10era izango da, eta gorputza izango da aurtengo ardatza. “Gorputza ardatz hartuta, arteak eskaintzen dizkigun hainbat prismatatik begiratuko diogu gorputzari, bere esanahi askotarikoak ezagutzeko. Dantza, filosofia, literatura, artea, antzerkia, argazkilaritza eta bertsoa: horiek izango ditugu gorputzera hurbiltzeko bide. Galdera berriak planteatuko ditugu, aurrez geneuzkan erantzunak zalantzan jarri eta berriak aberasteko “.
Astebeteko egitaraua antolatu dute, eta elkarrizketa sustatu nahi dute herriko eta Euskal Herriko artisten zein hurbiltzen diren haur, gazte, heldu eta adinekoen artean.
“Gorputza ulertzeko modu asko daude, eta, era berean, bere esanahia aldakorra da begiratzen dugun prismaren arabera. Paleolito garaiko Willendorfeko Venusa, emakume desproportzionatua irudikatzen duen eskultura txikia omen da. Gizonak egindako ugalkortasunaren ikurra. Baina ispilurik ez zegoen garai haietan, nola ikusiko ote zuen bere gorputz biluzia haurdun zegoen emakume batek? Goitik behera begiratuta, eskulturatxoaren antz ikaragarria izango luke. Beraz, agian emankortasunaren sinbolo sexual izan ordez, emakumeek euren gorputza irudikatzeko modua baino ez zen. Gorputzei buruz pentsatzen dugunak nola eragiten du gure kulturan? Eragiten al du gorputzei buruz idazteko edo irudikatzeko dugun moduak? Laguntzen digute gorputzek gure errealitatea ulertzen? Gauzei begiratzeko dugun modua aldatzen dugunean, begiratzen ditugun gauzak aldatu egiten dira”, diote Hitzen Lihokoek.
Honatx Hitzen Lihoak Hitzari helarazi dion bideoa.
Azaroak 4, astelehena
- 18:30 Gorputz artean pintura erakusketaren inaugurazioa. Landetxeko sarreran.
Azaroak 6, asteazkena
- 19:00: Gorputzak ginen, baina ez geunden horretaz jabetuta manifestua –Mari Luz Estebanek idatzi du aurtengo manifestua–.
- Ondoren, Vulnerable Trypyich ikerketa koreogafikoa. Gonbidapenak, hemen.
Azaroak 7, osteguna
- 19:00: Bereiz liteke pentsamendua gorputzetik? pote filosofikoa. Irati Zubiaren eskurik, Kastro Berri tabernan.
Azaroak 8, ostirala
- 19:00: Gorputz artistikoak eta literarioak espazio publikoan: desplazamendu feministak mahai ingurua –Iratxe Retolaza, Jone Rubio eta Irati Majuelo–. Landetxen. Sarrerak, hemen.
Azaroak 9, larunbata
- 10:00: Nahi duguna izango gara antzerki tailerra 9-12 urte bitartekoentzat –Ane Gebara eta Josune Velez de Mendizabal–. Karaez 4 lokalean. Izena eman behar da helbide honetara idatzita azaroaren 4a baino lehen.
- 11:00: Gorputzgramak lantegia, helduentzat. Arizmendienean –Nagore Legarreta eta Idoia Beratabardbide–. Izena eman behar da helbide honetara idatzita azaroaren 7a baino lehen.
- 19:00: Artxibo biluzia konferentzia performatiboa. Landetxen. Sarrerak hemen edo egunean bertan hartu daitezke, leihatilan (zortzi euro).
- 22:00: Gorputzen errebuelta genero anitzeko argazki saioa. Proba lekuan. Argazki saioan parte hartzeko mezua bidali behar da helbide honetara, azaroaren 8a baino lehen.
Azaroak 10, igandea
- 11:30: Odol mamituak liburuaren irakurketa jarraitua. Kontzejupean. Izena eman behar da helbide honetara idatzita hilaren. 31 baino lehen.
- 11:00-13:30: I. Hitzen Lihoa Liburu Azoka Ttikia. Kontzejupean. Liburuak sinatzen egongo dira Aintzane Galardi eta Karmele Mitxelena.
- 14:00: Bertso bazkari literarioa. Girizia elkartea. Alaine Agirreren Odol mamituak liburuan oinarrituta, idazlea bera izango da gai jartzailea. Bertsotan, aldiz, Onintza Enbeita, Alaia Martin eta Aner Peritz ariko dira. Sarrerak Landetxe tabernan edo helbide honetara idatzita. Sarrera orokorra hogei euro da; langabetuena hamabost, eta bertso bazkaria bakarrik 5 euro.
Egitarua osorik ikusteko, egin klik hemen.
