"Arrakastaz" bukatu dituzte Azkuene kaleko mendi hegala egonkortzeko lanak
42. zenbakiaren parean dagoen mendi hegala egonkortzeko lanak bukatu dituzte. Irristatze arazoak konpontzeaz gain, oinezkoentzako azpiegitura ere hobetu dute.
Zabalik da dagoeneko pasabide berria. Trintxerpeko Azkuene kaleko 42. zenbakiaren parean dagoen mendi hegala eta bertatik pasatzen zen pasabidea behin betiko konpontzeko lanak bukatu berri ditu udalak, “arrakastaz”, erakundeko iturrien arabera. Lanekin lurraren irristatze arazoak konpontzeaz gainera, oinezkoentzako azpiegitura ere hobetu dute.
Izan ere, azken urteetan luiziak izan dira bertan eta egoera “larriagotzen” joan dela diote udaleko iturriek. 2019an larrialdiko esku hartze bat izan zela gogorarazi dute, baina halere, “epe luzerako segurtasuna bermatzeko” ez zela nahikoa izan diote, “lurraren ezegonkortasunak arazo izate jarraitzen baitzuen”.
Iraitz Pazos Trintxerpeko alkateorde eta era berean zinegotziak aipatu du mendi hegalaren ezegonkortasuna inguruko eraikinentzat eta oinezkoentzat “arriskutsua” zela eta bukatu berri dituzten lanekin “lurraren segurtasuna eta egonkortasuna bermatu” dutela, “lur irristatzeen arriskua ezabatuz, eta inguruko oinezkoen irisgarritasuna hobetuz”.
Lanei esker, arrisku guztiak zuzendu direla erantsi du, eta lanen gaineko xehetasunak eman ditu. 30 metro inguruko zabalera eta 10 metroko desnibela duen ezpondaren alboetan altzairuzko erreien pantailak jarri dituzte, “lurra egonkortzeko”, eta pasabidea hormigoi armatuzko lauza batekin berreraiki dute, “irisgarritasuna ere hobetuz”, alboko eskailerak kendu baitituzte. Drainatze sistema bat ere instalatu dute, eta horrek, Pazosen arabera, “segurtasun handiagoa bermatzen du euri jasa handiak izanez gero”. Emaitza “oso ona” izan dela nabarmendu nahi izan du alkateordeak, “arrakastaz” bukatu dituztela lanak.
Lanetarako 125.472 euroko inbertsioa egin dute, eta bi hilabeteko iraupena izan dute. Gainera, urtebeteko berme aldia ezarri dutela jakinarazi du Pazosek, “egindako lanen iraunkortasuna ziurtatzeko” asmoz. Bukatzeko, bi hilabete hauetan trintxerpetarrek “erakutsitako ulermena eta pazientzia” eskertu ditu udal ordezkariak.
Lanen aurretik mendi hegalak eta pasabideak zuten itxura.
