Euskararen alde egindako lana aitortu diete pasaitarrei
Dozenaka lagun elkartu ziren Trintxerpen egindako Bokalaren bigarren topaketan atzo. Sari banaketa ere izan zen.
Dozenaka lagun bildu zituen bigarren topaketak. Pasaian euskararen biziberritzearen alde lan egiten duten eragile, elkarte eta norbanakoek topaketa egin zuten atzo Trintxerpen. Dozenaka lagun inguru elkartu ziren Bokaleren bigarren topaketan. Bertan, aisia, kultura eta kirol arloetako elkarteetako ordezkariak, euskaltegietako irakasle zein ikasleak, ikastetxeetako irakasle eta gurasoak, enpresetako ordezkariak, merkatariak, gazte taldeak, udaleko ordezkariak eta herritar euskaltzaleak izan ziren.
Udaleko iturrien arabera, topaketa horren helburua “Pasaian euskara gehiago erabil dadin hainbat arlotan egin den lana ezagutaraztea” izan da, “eta horri balioa ematea”. Eragileek elkar ezagutzeko, elkarrengandik ikasteko eta elkarrekin indar handiagoz aurrera egiteko baliatu nahi izan du Bokalek bigarren hau ere.
“Hanka instituzionala eta hanka soziala euskararen biziberritzean ere elkarrekin aritzea” sustatu nahi dutela esan zuen atzo Teo Alberro alkateak, horrela, “indar handiagoa egiteko aukera dugulako”. Horrelako topaketak horren adierazle direla esan zuen, eta sendotzen jarraitzen duela udalaren eta herriko eragileen arteko elkarlana. Udalak ere euskararen biziberritzean “ardura berezia” duela erantsi zuen Alberrok.
Alkatearen hitzen ondoren, Bokalaren bideo bat proiektatuko zuten, elkarguneetan egiten ari diren lana ezagutarazteko. Jarraian, sortu berri dituzten bi elkarguneetako ordezkariek hitza hartu zuten. Beste hainbat ordezkarik bezalaxe, Amets Aranguren eta Aner Peritz gazte sortzaileek euren bizipen eta esperientziak elkarbanatu zituzten.
Sari banaketak ginga jarri zion atzoko topaketari. Pasaiako herritarren “aktibazioa eskertzeko” asmoz, eta euskarari indarra emateko bidean ibilbide bat egina duen Andoni Ollokiegi musikaria saritu zuten batetik, “euskal kantugintzaren transmisioan egiten ari den lanarengatik”; bestetik, Irakurle Klubak saria jaso zuen, “euskarazko literaturaz gozatzeko aukera paregabea emateaz gain, Pasaiako euskal komunitatea sendotzeko baliagarria delako”, Bokaleko kideen arabera.
Bi saridunek Mari Luz Etxanizek egindako margolana eta Eider Perezen bertsoa jaso zituzten oroigarri gisa. Eta topaketa biribildu eta bukatzeko, Mejillon Tigre kolektiboak emanaldi berezia eskaini zuen.
