Garai latzenetan ere, umorea beti irabazle
Pasaiako Umorezko Antzerki Jardunaldiak asteburu honetan bukatuko dira, hiru emanaldirekin. Haurrentzako zein helduentzako emanaldiak izango dira Trintxerpen, San Pedron eta Donibanen.
Joan den ostiraleko B.O.B.A.S. emanaldiko irudi bat. Bigarren asteburuz jarraian, pasaitarrak barrez lehertzeko prest dira. Pasaiako Umorezko Antzerki Jardunaldien (PUAJ) 43. edizioaren azken emanaldiak izango dira gaur, bihar eta etzi. Eguneroko zereginen zurrunbilotik atera eta arratsalde dibertigarria pasatzera deitu ditu herritarrak Aitor Brion Kultura eta Ondare zinegotziak. Aurrekoan bezalaxe, asteburu honetan ere «artista bikainak» izango direla aurreratu du.
Aurreko asteburuko hiru emanaldiek izandako harrerekin oso pozik da Brion, adin tarte guztiek «umorea espresio ezberdinetan» gozatzeko aukera izan dutelako. Astebururako aurreikusi diren hiru emanaldiek bide beretik joko dutela dio, aurtengoan publiko zabal bati iritsiko zaizkiela. «Haur, gazte eta helduek, denek izan dute eta izango dute barre egiteko aukera».
Lehenik, LJ 75 lanean jarraitu izeneko lana eskainiko du gaur Barsanti konpainiak aire zabalean, 19:00etan, San Pedroko proisan. Golden Apple Quartet taldeak utzitako hutsunea (bertan behera geratu da haien emanaldia, arrazoi pertsonalengatik) luxuzko talde batek ordezkatuko du bihar: Txalo Produkzioak-eko Ramon Agirre, Joseba Apaolaza eta Asier Hormaza aktoreak igoko dira oholtzara. Artea izeneko emanaldia eskainiko du hirukoteak. Brionen arabera, «oso-oso arrakastatsua» izan da sorkuntza hori, hortaz, pasaitarrak sarrerak azkar erostera gonbidatu ditu (10 euroan). 19:00etan izango da emanaldia, Juanba Berasategin. Igandean, berriz, etxeko txikinen txanda izango da. Tomax pailazoak, Azken festa izeneko emanaldia eskainiko du, 17:00etan, Juanba Berasategin (sarrerak 3 euro).
Brionek nabarmendu du «guztiz errotutako topaketa» dela PUAJ, antzerkiaren munduan, eta bereziki umorezkoan, «erreferente» bilakatu dela.
