'Gezi beltzak' tailerrak antolatu ditu Metrokoadroka kolektiboak
'Hastapenak' eta 'Paperetik gorputzera' tailerrak emango dituzte Ehuntze sormen espazioan. Oier Guillan izango da saioen gidaria.
Laugarrenez antolatu ditu Metrokoadroka kolektiboak Gezi beltzak tailerrak. Oiartzungo Ehuntzen sormen espazioan izango dira saioak, eta aurtengoan bi tailer antolatu dituzte: Hastapenak eta Paperetik gorputzera.
Hastapenak antzerki idazketari buruzko tailerra da, eta idazketaren munduan murgiltzen hasi edo apur bat sakondu nahi duen jendeari dago zuzenduta. Helburua gauzak probatzeko eta partekatzeko konfiantzazko giroa sortzea da, idazketa teknika ezberdinak ezagutzeko eta esperimentatzeko.
Hamabostean behin (ostegunetan) izango dira saioak, 18:00 – 20:0 artean, eta Oier Guillan izango da saioen gidaria. 25 euro ordaindu behar da hilabetean, eta izena emateko azken eguna azaroaren 6a izango da. Tailerra azarotik martxora izango da.
Paperetik gorputzera tailerra, berriz, idazketa tailer monografikoa da, eta antzerkia; dramaturgia; gidoigintza; performancea eta formatu hibridoak landuko dituzte. Zehazki, oholtzarako idazketan murgiltzeko edo sakontzeko laborategi gisa definitu dute antolatzaileek, eta ez dela aldez aurreko esperientziarik behar azpimarratu dute.
Tailer hau urtarriletik martxora izango da (larunbat goizetan, hamabostean behin), 10:00 – 13:30 artean, eta hilabetean 50 euro ordaindu behar dira. Oier Guillan izango da saioen gidaria, eta Amancay Gaztañaga, Mikel Ayllon eta Yurre Ugarte idazleek eskola magistralak eskainiko dituzte. Tailer honetan izena emateko azken eguna abenduaren 15a izango da.
