Klima aldaketari aurre egiteko, lankidetza
Pasaiako Udalak erronka honi erantzuteko bide berriak urratu nahi ditu, eta horretarako proba pilotu bat egingo dute San Pedron datorren astean.
Jaizkibel eta Ulia mendietako argazki ederrak egin ditu Virgina Gil Cousok 'Pasaiabistak' erakusketarako. Klima aldaketari erantzungo dion prozesu bat garatu nahi du Pasaiako Udalak, eta horretarako Klima-Orratz izeneko proiektua abiatu du. Erronka honi erantzuteko “bide berriak urratu” nahi ditu erakundeak, eta hori egiteko proba pilotu bat egingo dute San Pedron datorren asteazkenean (hilak 30). Udal aretoan izango da, 18:30etik 20:30era.
Proiektu hau Mariana Mazzucato nazioarteko adituak proposatutako “misioen ikuspegiari” jarraituz egingo dutela azaldu du Iraitz Pazos Ingurumeneko zinegotziak. Horretan oinarrituta, San Pedroko eragile publiko, pribatu eta komunitarioak identifikatu eta guztien artean “klima aldaketari erantzungo dion prozesu bat burutzea” da asmo nagusia. “Izan ere, klima aldaketaren erronka hain da konplexua, ezen ezinezkoa baitzaio administrazioari bakarrik erronka horri erantzutea”, esan du Pazosek. “Egiteko modu berri batez ari gara, lankidetza publiko-pribatu-komunitarioa bilatzen duena, eta ezagutza eta ahalmen komunitarioa aktibatzeko gai dena”, erantsi du zinegotziak.
Egitasmoak arrakasta izan dezan, udalak “ezinbestekotzat” jo du eragile eta norbanakoen parte hartzea, eta asteazkeneko saioa “oso garrantzitsua” izango dela. Bilkura horretan proiektuaren gaineko xehetasun gehiago emango dituzte.
