Zibilizazio krisiaren aurka, Oiartzun Burujabe
Burujabetzak jardunaldiak egin dituzte Oiartzunen hilaren 17an eta 18an. Halaber, Oiartzungo Burujabetzen Egunak oiartzuarrak herri itunarekin konprometitzera deitu ditu hilaren 19an.
Herri proiektu bat da Oiartzun Burujabe; herriko ehun ekonomiko, sozial eta instituzionala barnebiltzen dituen egitasmoa. Zibilizazio krisiaren aurrean herriak proposatzen duen alternatiba praktiko bat. Gaur egungo ekonomia eredu nagusiaren helburuak kapitala metatzea eta ahalik eta etekin handiena ateratzea da, zuzenean edo zeharka gizartean eta ingurumenean eragiten dituen ondoriok aintzat hartu gabe. Horregatik, “premiazkoa” da trantsizio ekosozialerantz urratsak egitea eta garapen ereduaren inguruko hausnarketa sakona egitea.
Herriari burujabetza tresnak itzultzeko bide horrek gauzak egiteko beste modu bat eskatzen du; Oiartzun Burujabe prozesua, beraz, gobernantza eredu berria lortu nahi duen udalgintza egiteko modu berri bat da.
Sektoreka landuko den bidea da aipatutako prozesua, eta mahai sektorialetan arloari dagozkion erabaki estrategikoak, taktikoak eta plangintzak erabakiko dira. Halaber, mahai horietan planak aurrera eramateko beharko diren baliabideak definituko dira, kontuan hartuz bitarteko horiek herritarrek, eragile ekonomikoek edota udalak eskaini ahal izango dituztela. Epe luzerako ikusmira eta inplikazioa eskatzen dituen proiektua da, ahalduntzea eskatzen duena.
Elikadura burujabetza arloko mahai sektorial baten aurkezpena.
Hiru erpinez osatutako eredua
Proiektuaren hanketako bat dira herritarrak, elkarteak edo eragileak, komunitateari ahotsa eta partaidetza ematen zaizkiola bermatzen dutenak. Udala da bigarren hanka, eta haren parte hartzearekin unibertsaltasuna ziurtatzen da: jendarte osoarentzat baliagarria den eredua izatea eta herritar guztiek irisgarritasunerako aukera berdinak izatea bermatuko dira. Azkenik, alderdi ekonomikoa dago. Ekonomia sozialaren printzipioak kontutan hartzeak bermatzen du jarduera ekonomikoak “izpiritu kooperatiboa” jarraitzen duen kudeaketa eredua bilatuko duela. Kasu batzuetan eragile ekonomiko berriak —herri kooperatibak— sortuko dira, gehiengoaren beharrak modu demokratikoan ase ahal izateko.
Ezkerreko balioak
Prozesu horretatik sortuko diren proiektu edota egitasmoak —baita prozesua bera ere— ezkerreko balio eta printzipioetan oinarrituko dira: anitzak eta transbertsalak izango dira, herritarren gehiengoari ekarpen materiala egingo diotenak eta logika edota mekanismo esplotatzaileak ezabatzeko bidea markatzen dutenak. Trantsizio ekosoziala helburu, inguruarekiko jasangarriak izango dira, ikuspegi feministaduna eta botere harreman oro deuseztatzeko urratsak eman nahi dituena. Euskara eta euskal kultura izango dira proiektu honen oinarrian.
