Gau beltzenaren zain dira Lezon
Ostegun ilunabarra Gau Beltzarena izango da. Herriko eragileek izua zabalduko dute herriko kaleetatik, elkarlanean.
Iazko Gau Beltzeko pasarte bat. Argazkia: Nahia Sarasola. Herrian errotzen ari da Gau Beltzaren ospakizuna. Herriko eragileen arteko elkarlanetik, izua zabalduko da osteguneko ilunabarrean, Domu Santu egunaren bezperan. Festa eta euskal giroko izua, garai batean Lezon ere azaroaren 1aren harirako ospakizunak edo jarduerak egiten zirelako baserri giroan. “Euskal ohiturak berreskuratu, komunitatea sortu eta euskaraz bizitzeko aukera eskaintzen digu Gau Beltza festak”, zehaztu dute antolatzaileek.
Ostegunekoari dagokionez, 18:45ean hasiko dira ekintzak. Ordu horretan ludotekan dabiltzanek Gau Beltzeko dantza egingo dute Goiko plazan. 19:00etan hasiko da kalejira handia, herritik zehar egingo dena. Ibilbidearen bukaera Gurutze Santuaren plazan egingo dute, eta han Sutargi abesbatzak nahiz Murixkak dantza taldeak giroa ezarriko dute giro iluna euren emanaldiekin. Gainea, Beldurren erretzea egingo dute, eta Oroitzene AEKri esker gaztaina erreak jateko aukera izango dute hala nahi dutenek. Ilunabarrari ginga jartzeko, Orratx! antzerki taldekoek kalejira antzeztuari ekingo diote plazatik.
Aurrelanak eta eragileak
Osteguneko ekitaldien atzean aurrelan mardula dago. Horren seinale, gaur arratsaldean bertan (hilak 28, astelehena), osteguneko ludotekaren dantzaldia prestatzeko tailerra egingo dutela Murixkakoen laguntzarekin, ludotekaren ordutegian. Gainera, gaurtik hilaren 31ra arte dei egin diete herriko establezimenduei euren erakusleihoak Gau Beltzarekin apain ditzaten. Hilaren 24an kriseilu eta girnalda tailerra egin zen Gaxuxa Emakume Taldearen eskutik Aiton Bordan.
Honakoak dira Gau Beltzaren barruko ekitaldietan era batera edo bestera parte hartu duten herriko eragileak: Hezikuntza Guraso Elkartea; Errota Guraso Elkartea; Lezo Herri Eskola; Pasaia-Lezo Lizeoa; Lezokoak Merkatari, Ostalari eta Zerbitzu elkartea; Orratx! Antzerki Taldea; Oroitzene AEK; Trapujale Taldea; Gaxuxa Emakume Taldea; Lezoko Emakume Taldea; Kuadrillategi; Lezoko Udala; Aiton Borda; Murixka Dantza Taldea; Sutargi Abesbatza; Jaixkipe txaranga; Txerrimuño; Lezoko Ludoteka.
Jarraian datorren esteka baliatuta, iazko Gau Beltzaren irudiak eta bideoa ikusteko aukera.
