[Bideoa eta argazkiak] Lezoko gaua beltza izan da
Dozenaka eta dozenaka lezoar bildu ziren atzo, garai bateko ohiturak berreskuratzeko asmoz, herrian zehar. Gau Beltza ospatu zuten.
Asteak eta asteak eman dituzte prestaketa lanean. Merezi izan du elkarlanak. Atzo lehenengoz egin zuten herri osoan zehar Gau Beltza. Beldurgarria bezain arrakastatsua izan zen. Dozenaka arima galduk bat egin zuten 19:00etan hasi zen desfilean, eta ondorenean izan ziren ekitaldi guztietan ere izua, jai giroa eta ohitura zaharrak berreskuratzeko nahia batu ziren.
Kalejira egin zuten atzo beldurgarri izan ziren lezoarrek lehenik, Goiko plazatik abiatuta. Jaixkipe txarangak eta musika eskolako danborrariek ezarri zuten erritmoa. Ondoren, Gurutze Santuaren plazan beldurrak erre zituzten gaztainen usainpean, eta azkenik, Orratx! Antzerki Taldeak egunerako propio prestatutako beldurrezko istorioak entzun zituzten.Hori bakarrik ez: Sutargi abesbatzak Tomas Garbizu Musika Eskolako bandako kideek lagunduta emanaldia eskaini zuen plazan, eta musika hori Murixka Dantza Taldeak egunerako propio sortutako koreografia dantzatzeko baliatu zuen.
Domu Santu Egunaren bezpera Andoni Ollokiegiren kantaldi izugarriarekin bukatu zen, Piztu Lezoren ekarpena hori. Gainera, Lezoko jaietan eta Inauterietan ezagun diren pertsonaiek ere ez zuten hutsik egin.
Antolaketa lanean ibili direnek bihotzez eskerrak eman dizkiete era batera edo bestera lagundu duten norbanako, talde eta eragileei.
Jarraian, atzoko hainbat argazki eta bideoa, HITZAra lezoarrek bidalitakoak:
