Maialen Oiartzabal Mendibilek jaso du 2024ko Kirol Saria
Eskiatzaile akrobatikoa goi mailako kirol lehiaketetan izandako ibilbide oparoagatik omendu zuten.
Ostiralean egin zioten omenaldia Maialen Oiartzabal Mendibil eskiatzaile akrobatikoari, eta ekitaldian bertan eman zioten 2024ko Kirol Saria. Goi mailako kirol lehiaketetan izandako ibilbide oparoagatik egin zioten aitortza udalak, herriko kirol elkarteetako ordezkariek eta baita adiskide zein herritarrek ere.
Edorta Fernandez kirol zinegotziak eman zion IX. Kirol Saria herri guztiaren izenean. Oiartzabalen ibilbidea goraipatu zuen ordezkariak, eta bere kirol garaipenez gain, beste hainbat merituengatik ere saria jasotzeko arrazoiak dituela nabarmendu zuen zinegotziak: “Bere kirol ametsa betetzeko Andorrara joan zen emakumea da Maialen. Kirol txiki batean, banakako kirolean, oztopo handiak gainditu ditu. Oiartzuarrontzat eta etorkizuneko belaunaldientzat kirolari emakume erreferentea bilakatu da. Gaur herriak eman dizu saria, baina zalantzarik gabe, zuk askoz gehiago eman diozu herriari”.
Hunkituta jaso zuen garaikurra Oiartzabalek, eta esker oneko hitzak izan zituen udalarentzat, herriko kirol klubentzat eta ekitaldira hurbildu ziren lagun eta herritarrentzat: “Guztiz eskertuta nago bizitako esperientziagatik, ikasitako guztiagatik eta ezagutu dudan jendeagatik. Oso zorioneko sentitzen naiz bide eder hau zuekin partekatzeko aukera izan dudalako”.
