Portuko eta Algeposako langile ohi baten senideek kalte ordaina eskatu dute
Amiantoaren Biktimen Euskal Elkarteak elkarretaratzea egin du gaur Donostian, Pasaian lanean urte luzez aritutako langile baten heriotza amiantoaren eraginez izan zela salatzeko.
Gaurko elkarretaratzearen irudi bat. Urte luzez Pasaiako Portuan, Algeposan eta Hernaniko Biyak-Bat paper fabrikan lanean aritutako Juan Carlos P.T.-ren senide eta gertukoek kalte ordaina eskatu diete hiru enpresa hauei. Izan ere, Asviamie elkarteak (Amiantoaren Biktimen Euskal Elkarteak) salatu du amiantoak eragindako gaixotasun batengatik zendu zela langile ohia. Gaur (hilak 28) elkarretaratzea egin dute zenbait lagunek Donostiako Epaitegi parean, eskaeraren gaineko auzi saioa egin baitute bertan.
Demanda honen arabera, 166.745,56 euro erreklamatzen dizkiete Papelera Biyak-Bat enpresari, Pasaiako Portuko Agintaritzari eta Algeposari, enpresek ez baitzituzten, salatzaileen arabera, “amiantoaren arriskuei aurre egiteko segurtasun neurriak bete”.
2022an biriketako adenokartzinoma baten ondorioz zendu zen langile ohia. Mekanikari gisa aritu zen Papelera Biyak-Bat enpresan 1974tik 1983ra, mantentze lanetan. Portuko Agintaritzan 1985etik 1998ra bitarte aritu zen, garabien eta salgaiak garraiatzeko ibilgailu handien balazta zapatak konpontzen eta ordezten. Jarraian, 1998tik, Algeposa-n egin zuen lan, makinari lanetan eta konponketak egiten. 2022ko urrian hil zen.
Donostia Ospitalean 2021eko martxoaren 24ko egindako txostenera jo dute salatzaileek, eta horren arabera, “biriketako adenokartzinoma bat” diagnostikatu zioten, “hainbat hamarkadatan amiantoaren eraginpean egon zelako”. Ebidentzia hori egon arren, ez zutela “susmorik jakinarazi” salatu dute. 2023an, berriz, Osalanek txosten bat egin zuen, eta honek ere berresten du langile ohia “amiantoarekin egon zela kontaktuan eta hura manipulatu zuela”. Eskaeran azaldutako gertakariak egiazkoak badira, litekeena da hiru enpresetan “mantentze lanetako eta konponketetako mekanikari lanetan amianto zuntzak arnastearen eraginpean egotea”.
“Kalte moral” gisa, aurreko lerroetan aipatutako diru kopuru hori (166.745,56 euro) erreklamatu dute alargunarentzako eta seme alabentzako.
Aldarrikapen gehiago
Gaurko mobilizazioa aldarrikapen gehiago egiteko probestu nahi izan dute manifestariek. Bide batez, “substantzia kantzerigeno anitzen aurkako segurtasun neurri zorrotzak” eskatu dizkiete enpresei eta Pasaiako portuko bi langile ohiren kasuak gogorarazi dituzte. Amiantoaren Biktimen Euskal Elkarteko kiden arabera, portuko “bi langile gutxienez” amiantoak kaltetutako minbiziarekin daude. “Horrek erakusten du, lan gaixotasunak perretxikoak bezala zabaldu edo azaltzen direla”, esan dute, amorruz, gaurko elkarretaratzean.
