Urteko gau ilun eta beldurgarrienaz gozatzeko prest dira Pasaiako haurrak
Gau Beltzak zientoka haur eta guraso bilduko ditu beste urte batez Antxon, Donibanen eta San Pedron. Etxeko txikienak ostegunerako irrikaz dira.
Iazko Gau Beltzean Pasaian ateratako irudi bat. Pasaiako haurrak osteguneko (hilak 31) Gau Beltzerako prest eta irrikaz dira. Urteko gau ilun eta beldurgarrienaz gozatzera irtengo dira kalera zientoka haur eta guraso. Donibane, San Pedro eta Antxoko bizilagunek ostegunerako egitarau oparo bezain beldurgarriak antolatu dituzte. Trintxerpetarrek, berriz, Akelarre Gaura mugatuko dute aurtengo Gau Beltzaren inguruko ospakizuna (asteburuan izango da).
Jarraian, hiru barrutietako bizilagun eta eragileek etzirako antolatutako egitarauak:
Antxo (Biteri plazan):
- 17:00: Kalabaza tailerra egingo dute 17:00etan. Kalabazak etxetik eramateko deia egin dute. Jarraian, Gau Beltzaren aurpegi margo keta egingo dute beldurren txokoan.
- 18:30: Txokolatada.
- 19:00: Ekitaldi nagusia: arimen ibilbidea (dantzak, beldurren bilketa eta erreketa).
Donibane (Kultur Aterpean, Bixi Bixik antolatuta):
- 17:30: Tailerra egingo dute gurasorik gabe. Material etxetik eramateko deia egin diete haurrei.
- Jarraian, merienda egingo dute eta bukatzeko, karaokea.
San Pedro (pilotalekuan):
- 16:30: Mozorro tailerra. Koadrodun alkandora eta lastozko kapela eramateko deian egin dute.
- 17:30: Ziritik sarira. Aurten, etxez etxe goxoki bila joan beharrean, altxorraren bila moduko jolas batean ariko dira haurrak, sari baten bila.
- 18:30: Erititik hilerrira abiatuko dira, eta bidean zehar ikuskizun eta sorpresa beldurgarriak izango direla aurreratu dute. Jarraian, Lamiak dantza taldearen eta sorginen emanaldia izango dira herriko plazan.
- 20:30: Ibilbide beldurgarria plazatik (haur koskorragoentzat). Bidean “izualdiak” eta “benetako beldurra” izango dira nagusi.
