Senpereko Iduzkilore taldea eta 'Ihesi' antzezlana, Landetxen
Hilaren 24an izango da antzezlana, 19:00etan, Landetxen. Sarrerak eskuragarri daude Oiartzungo Udalaren webgunean.
Senpereko Iduzkilore antzerki taldeak geldialdia egingo du Oiartzunen hilaren 24an Ihesi antzezlanarekin. Oholtza gainean hiru emakume egongo dira, eta zuzeneko musika eskainiko dute eskusoinuarekin.
Bi emakume dira lanaren protagonista, eta bide bazterrean daude horiek. Sabina da emakumeetako bat, zahar etxetik eta inposatua izan zaion etorkizunetik ihesi dabilena. Marga da bestea, eta hura familiatik ihesi dabil, hatsik gabeko etxekoandre bizitik ihesi. Ihesbidean elkartu eta etorkizun berri bat irudikatuko dute jakin gabe haien ametsak zein neurritan gauzatuko diren.
Hona fitxa teknikoa:
- Testua: Pierre Palmade eta Christophe Duthuron.
- Itzulpena eta egokitzapena: Maddi Zubeldia.
- Zuzendaritza: Maika Etxekopar.
- Aktoreak : Bernadette Iratzoki Luro eta Maider Beheran.
- Musikaria : Ainhoa Elizondo.
- Teknikaria: Alban Fagoaga.
- Afitxa egilea: Inge Arin.
Iduzkilorek honela deskribatu du Ihesi izena:
Ihes. Ilusioaren ihizia, iritzien iraultza, indarraren inertzia, ideien isuria, ihintzaren isla, ilunaren isla.
Hatsa. Hesi hondatua, hasperen hunkikorra, haizen harmoniatsua, hazi hedatua, eta hegaldatzea haizu!
Eutsi. Erbestea etxe, erloju eroa, emari etengabea, ekiaren ederra, erraien errana.
Sorioneko. Sorgindutako salda, soroan soka saltoka, samin sendatua, eta suziriari su.
Irrintzi infitinoa.
Sarrerak hemen eros daitezke.
