65 urtetik gorako pasaitarren diagnostikoan parte hartzera deitu dute
Adineko pertsonen behar, interes eta kezkak ulertzeko udalak diagnostiko bat abiatu zuen uda hasi aurretik. Hilaren 28an hurrengo bilera egingo dute, Trintxerpen.
Pasaiako adineko pertsonen egungo beharrak, interesak eta kezkak ulertzeko abiatu duen diagnostikoarekin jarraitzen du udalak. Bilera erronda bat abiatu zuten uda hasi aurretik. Hilaren 28an (osteguna da) izango da hurrengo hitzordua, oraingo honetan, Trintxerpen. Barrutian izan arren, gainerako barrutietako adinekoei ere luzatu diete deialdia. 16:30etik 18:30era bilduko dira, alkateordetzan.
Aintzane Taberna alkateordeak bilera horretara gonbidatu ditu 65 urtetik gorako trintxerpetarrak: “Bertan parte hartzeko gonbidapena egin nahi diegu herritar guztiei, pertsona nagusien bizi baldintzak eta haien eguneroko erronkak hobetzeko konpromisoa duten guztiei”.
Alkateordetzak bileraren garrantzia nabarmendu du, “azken txostena osatzeko eta diagnostikoaren emaitzak hobetzeko” baliatuko baitute bilkura. “Saio honek Pasaiako pertsona nagusien beharrak hobeto ulertzea eta udal politikak eraginkorrago egitea ahalbidetuko du. Herritarren inplikazioa bultzatuz, udalak pertsona nagusien bizi kalitatea hobetzea eta udalerriko gizarte sarea indartzea du helburu”, erantsi du Tabernak.
Honako gaiak landuko dituzte hurrengo osteguneko saioan: hobekuntza arloak; jubilatuen elkarteentzako eta gizarte eragileentzako erronkak; zerbitzu soziosanitarioak; pertsona nagusien pertzepzioak, kultura, hezkuntza, aisia eta kirol eskaintza; belaunaldien arteko harremanen sustapena; eta nahi ez den bakardadearen prebentzioa.
