Pasaiako adinekoen beharrak, interesak eta kezkak jasotzen jarraituko du udalak
Pertsona nagusien behar eta dinamikak "hobeto ulertzeko" diagnostikoa abiatu zuen udalak uda hasi aurretik. Azken hiletan zenbait bilera egin dituzte, eta datozen asteetan beste bi hitzordu izango dira.
Adineko talde bat, kaletik. Pasaiako adineko pertsonen “egungo beharrak, interesak eta kezkak ulertzeko” asmoz, diagnostiko bat abiatu zuen udalak uda hasi aurretik. Udalerriko 65 urtetik gorako pertsonen beharrak eta dinamikak hobeto ulertzeko asmoz, zenbait bilera egin dituzte azken hiletan Antxon eta Trintxerpen. Orain, San Pedro eta Donibaneren txanda izango da. Datozen egunetan bilerak izango dira bi barrutietan.
San Pedrokoa datorren astelehenean (hilak 14) izango da, Palazio Txikian (Esnabide, 4), 17:00etatik 19:00etara. Donibanekoa, berriz, hilaren 28an (astelehena da) egingo dute, oraingo honetan Aintona-amonen aterpean (Juan XXIII 34), ordu berean.
Aintzane Taberna zinegotziaren arabera, “Udalarentzat funtsezkoa da Pasaiako pertsona nagusiek gaur egun dituzten errealitateak eta erronkak ulertzea”.
Diagnostikoari erreparatuta, honako puntu hauek ari dira lantzen: Pasaian bizi diren pertsona nagusien bizi baldintzak aztertzea eta diagnostikatzea, behar eta interes espezifikoak ezagutzea, gaur egun erabilgarri dauden zerbitzuak ebaluatzea eta jubilatuen elkarteetako zuzendaritza batzordeetarako kide berriak identifikatzea eta biltzea, “lidergo komunitarioa indartzeko” asmoz.
Diagnostikoa osatzeko, elkartzen diren taldeek landutako gaien artean, jubilatuen elkarteentzako eta gizarte eragileentzako erronkak, zerbitzu soziosanitarioak, pertsona nagusien pertzepzioak, kultura, hezkuntza, aisia eta kirol eskaintze, belaunaldien arteko harremanen sutapena edota nahi ez den bakardadearen prebentzioa aurki daitezke.
