Etorkizuneko San Pedro elkarrekin irudikatzera
Larrialdi klimatikoari aurre egiteko udalak eta barrutiko eragile eta norbanako ugarik lankidetza berezia abiatu dute. Hilaren 27an hurrengo bilkura irekia egingo dute.
Klima aldaketari aurre egiteko lankidetza berezia abiatu dute pasaitarrek. Klima-Orratz izeneko proiektuari ekin zioten joan den hilean San Pedron, etorkizun hurbil zein urrunean klima aldaketak eragin ditzakeen kalteei aurre egiteko lanean jarri dira udala eta barrutiko askotariko eragile, enpresa eta norbanako. Bilkura erronda bat abiatu dute, eta hauetan 2050. urteko San Pedro irudikatzen hasi dira, elkarri honako promesa eginez: klima aldaketari lankidetzan erantzungo diotela.
Bada, udalak hurrengo bilkuraren berri eman du. Datorren asteazkenean (hilak 27) izango da, San Pedroko udal aretoan, 18:30etik 20:30era.
San Pedron abiatu dute egitasmoa, baina gainerako barrutietara zabalduko dute datozen hiletan.
Honako helburua izango du lankidetza honek, udaleko iturrien arabera: “Larrialdi klimatikoaren ondorioen aurrean herritar guztiak babestuta izango dituen kostaldeko herria izatea Pasaia (ezarri duten urterako), komunitatearen saretzean oinarrituta soluzio berritzaile eta naturalak sortuko dituena larrialdi klimatikoari aurrea hartuz”. Udalak “ideia berritzaile eta eraldatzaileak elkarrekin sortzera” deitu ditu barrutiko bizilagunak.
