Antxoko hilketa matxista salatzera deitu dituzte etxeko langileak
SOS Arrazakeriako Etxeko Langileen Taldeak deituta, haien lankide zen emakumearentzat justizia eskatzeko mobilizazioa egingo dute bihar. Lanagatik bertaratu ezin direnei etenaldi bat egitera deitu diete.
Joan den igandean hilketa matxista salatzeko pasaitarrek egindako elkarretaratzearen irudi bat. SOS Arrazakeriako Etxeko Langileen Taldeak mobilizazioa egingo du bihar (hilak 4) Antxoko San Fermin elizaren aurrean, joan den larunbatean izandako hilketa matxista salatu eta haien lankide zen Leonorren senide eta gertukoei elkartasuna adierazteko.
“Leonor, gu bezala, etxeko langilea zen. Emakume ausarta, bere herrialdetik, Kolonbiatik, gutako asko bezala, emigratu zuena, berarentzat eta bere familiarentzat etorkizun hobe baten bila. Pertsona maitagarria zen, arduratsua eta oso alaia, bere alabak biziki maite zituena. Bere bizitza bidegabe eten zen, indarkeria matxistaren beste biktima askorena bezala”, esan dute elkartekoek, biharkoa iragartzeko bidali duten oharrean.
Etxeko langileak “errealitate latz” horretatik ez direla kanpo geratzen esan dute, eta haietako askok ere erasoak jasaten dituztela “emakume izate hutsagatik”: “Batzuek tratu txarren egoeretatik ihesi emigratzen dugu, eta askok hemen ere aurre egin diegu egoera horiei, gure lanetan. Leonorren kasuan bezala, gure familia eta lagunekiko distantziak zaurgarriago egiten gaitu. Gure batasunak bakarrik, elkartasun sareen bidez, emango digu beharrezko indarra zailtasunei aurre egiteko eta garena baino indartsuagoak izaten jarraitzeko”, erantsi dute, amorruz.
Eraildako emakumearentzat justizia eskatuko dute biharko elkarretaratzean, eta “erruduna legearen pisu guztiarekin zigortzeko” exijituko dute. Erakunde publikoei “baliabideak eta bitartekoak” eskatu dizkiete “arlo guztietan erabil ditzaten, baina etxeko lanetan ere”. “Ezin dugu jarraitu bizitzak eta familiak suntsitzen dituen basakeria hau onartzen. Leonor beti egongo da gure bihotz eta pentsamenduetan. Gure elkartasun eta babes osoa adierazi nahi diegu bere maiteei, batez ere bere bi alabei. Etxeko langileek behar duten guztirako gurekin konta dezaketela esaten diegu”.
Gipuzkoako etxeko langile guztiak kontzentraziora deitu dituzte. Lanagatik bertaratu ezin direnei ordu horretan bertan etenaldi bat egitera eta minutu bateko isilunea egitera animatu dituzte, “hildako gure lankidearen oroimenez”.
