Portuko Agintaritza "kaleratze aginduak prestatzen" ari dela salatu du Etxebizitza Sindikatuak
Agintaritzak Eskalerillaseko bloke osoa eraisteko nahian jarraitzen duela salatu dute. Oraingo honetan ere bizilagunek ez dutela jakinarazpen ofizialik jaso deitoratu dute.
Atzo Eskalerillasen egindako agerraldiaren irudi bat. Eskalerillaseko bizilagunek borrokan jarraitzen dute, tinko. Joan den otsailean Trintxerpeko Herrera kaleko 10-11 sotoetako bizilagunek borroka hasi zuten, hamarkada luzez euren bizitokia izan dena uzteko agindua jaso baitzuten. Ordutik, kale gorrian geratzeko arriskuan izan dira, eta egoerak bere horretan jarraitzen duela salatu zuen atzo Oarsoaldeko Etxebizitza Sindikatu Sozialistak. Agerraldia eskaini zuten bizilagunekin batera.
Atzoko agerraldian gogorarazi zuten Pasaiako Portuko Agintaritzak etxebizitza bloke osoa eraitsi nahi duela. Zamen garraiorako trenbide bat eraikiko dute eta horrek eragin zuzena izango du Eskalerillas kaleko blokean, erabat eraitsi beharko baitute. Bertan, hamabi familia bizi dira gaur egun, Etxebizitza Sindikatuaren eskutik, borroka honetan murgildu direnak.
Ordutik ez dutela inolako “alternatiba errealik” jaso salatzen jarraitzen du Etxebizitza Sindikatuak, eta horren aurrean, tinko eutsi diotela borrokari: asanblada irekiak, manifestaldiak, elkartasun egunak, sinadura bilketak… Hamaika modutara aritu direla gogorarazi dute.
Borroka luze horren ondoren, joan den uztailean Pasaiako Portua eta Euskal Trenbide Sarearen (ETS) arteko proiektua martxan jartzeko sinadura bertan behera gelditu zela jakin zuten bizilagunek. Honen berri “beraien kabuz” izan zutela salatu dute sindikatuko kideek, “eta ez udala, Eusko Jaurlaritza edota kaleratzearen errudun nagusia den Portuko Agintaritzaren partetik, hauetaz ahaztu direlarik, egoeraren konplize bihurtuz”, haien hitzetan.
Lasaitasun egoera batera “heltzetik urrun”, salatu dute bizilagunei ohartarazi berri dietela “hau martxan jarri duten politikari, portuko agintari nahiz enpresariek ofentsibara jo eta proiektua lehenbailehen berrabiarazi nahi dutela”. Sindikatu sozialistako kideen arabera, ETS bizilagunak noiz etxegabetuko zain dago “proiektuari argi berdea emateko, honela eskuak garbitu eta pilota Portuaren teilatura bidaliz”.
“Gertakari hauek garbi uzten dute negozioa dagoela etxebizitzaren eskubidearen gainetik”, erantsi dute. “Antza denez”, portuko agintaritza “kaleratze aginduak prestatzen” ari dela salatu dute: “Baina berriro ere ofizialki ez die inork ezer jakinarazi. Horiei guztiei argi esan nahi diete eurek borrokan jarraituko dutela eta adi egoteko honen aurrean aurrera eraman litezkeen ekintzei”.
Bukatzeko, abenduaren 14an Etxebizitza Sindikatu Sozialistak Bilbon egingo duen manifestaziora deitu dituzte pasaitarrak sindikatuko kideek eta bizilagunek berek. Plaza eliptikotik abiatuko dira manifestariak, 13:00etan, Etxebizitza eskubidea bermatu, negozioari ez! lemapean.
