Koltxoien iruzurraren kasu gehiago antzeman dituzte Pasaian
Urrian hasi ziren merkataritza jardunbide oldarkor horiek antzematen. Azken asteetan Trintxerpen eta San Pedron kasu gehiago izan direla ohartarazi dute.
Joan den urrian herrian antzemandako iruzur baten berri eman zuen Pasaiako Udalak. “Merkataritza jardunbide oldarkorrak” antzematen hasi ziren orduan, koltxoiak saltzeko ustezko enpresa baten izenean. Bada, azken asteetan kasu berri gehiago antzeman dituztela ohartarazi du udalak, bereziki Trintxerpe eta San Pedron.
Iruzurgileek, kasu gehienetan, ustezko enpresa bateko ordezkarien etxez etxeko bisitekin hasten dute iruzurra, “adineko pertsonak aurkitzeko familia inkesta bat uzteko aitzakiarekin”. Ondoren, koltxoiak saltzeko prozesu “oldarkor” bati ekiten diotela dio udalak, eta erosleari ez diotela uzten eskaintza konparatzen, “ezta iritzia aldatzen ere”.
Bereziki adineko norbanakoei zuzendutako iruzurrak direla erantsi dute udaleko iturriek, eta aholkatu dute “halako egoeren aurrean etxeko atea ez zabaltzeko, bereziki, bizilagunak tankerako zerbitzurik eskatu ez baldin badu aurrez”. Atea irekiz gero, lehenago bizilagun, senide edota gertuko beste norbaiti kontsultatzeko eskatu dute, baita kontratua arretaz irakurtzea, produktua itzuli ahal izateko aukerari buruz informazioa eskatzea eta erabakia ausnartuta izan arte koltxoi zaharra erretiratzeko baimenik ez ematea ere. Erosketaren egiaztagiri guztiak eskatu eta gordetzeko ere gomendatu dute.
Praktika susmagarririk antzemanez gero, 943 00 43 00 telefono zenbakira hots egiteko deia egin diete pasaitarrei.
