Etxez etxe koltxoiak saltzeko iruzur baten berri eman du udalak
Iruzurgileak adinekoen etxeetara jotzen ari dira, ustezko enpresako ordezkarien bisita bat simulatuz.
Pasaiako Udalak herrian antzemandako iruzur baten inguruan ohartarazi nahi izan ditu herritarrak. Udalak eta Udaltzaingoak jakinarazi dute “merkataritza jardunbide oldarkorrak” antzeman direla Pasaian azken asteetan. Udaleko iturrien aranera, iruzurgileek, “kasu gehienetan, ustezko enpresako ordezkarien etxez etxeko bisitekin hasten da, adineko pertsonak aurkitzeko familia inkesta bat uzteko aitzakiarekin”. Ondoren, “koltxoiak saltzeko prozesu oldarkorrari” ekiten diotela jakinarazi dute, eta erosleari ez diotela uzten eskaintza konparatzen, ezta iritziz aldatzen ere.
Egoera honen aurrean, udalak adinekoei egin die deia bereziki, eta aholkatu diete halako egoeren aurrean etxeko atea ez zabaltzeko, “bereziki, bizilagunak tankerako zerbitzurik eskatu ez baldin badu aurrez”. Atea irekiz gero, lehenago bizilagun, senide edota gertuko beste norbaiti jakinarazteko deia egin diete. Kontratua arretaz irakurtzea, produktua itzuli ahal izateko aukerari buruz informazioa eskatzea eta erabakia hausnartuta izan arte koltxoi zaharra erretiratzeko baimenik ez ematea dira udalak eman dituen beste aholku batzuk. Erosketaren egiaztagiri guztiak eskatu eta gordetzea ere gomendatu diete.
Horrelako praktika susmagarriren bat ikusi edo jasanez gero, Udaltzaingora deitzeko deia egin dute, 943 00 43 00 telefono zenbakira.
