Oiartzo Ikastolako hiru ikasle, batxilergoko kalifikazioengatik sarituak
Maider Otegi, Jon Cecilia eta Manex Irigoienek 2023-2024 ikasturteko EAEko batxilergo sari bereziak jaso dituzte. Hirurak Oiartzo Ikastolakoak dira.
Jon Cecilia, Manex Irigoien eta Maider Otegi sarituak Oiartzo Ikastolako hiru ikaslek 2023-24 ikasturteko EAEko batxilergo sari bereziak jaso dituzte: Maider Otegi, Jon Cecilia eta Manex Irigoien dira. Ekitaldia Gasteizen izan zen atzo, eta EAEko 16 gazte saritu zituzten, tartean, aipatutakoak, gipuzkoar bakarrak.
Iaz EAEn batxilergoko bigarren mailan aritu ziren 454 ikaslek hartu zuten parte batxilergo bereziak saritzeko probetan. Parte-hartzaile guztiek betetzen zuten batxilergoan 8,75 puntuko edo hortik gorako batez besteko kalifikazioa lortu izanaren baldintza. Probak ekainaren 13an egin ziren, Bilboko Ingeniaritza Eskolan. Azterketak hiru ariketaz osatuta zeuden (batxilergoko modalitatearen berezko jakintzagai bati lotutako proba bat, eta hizkuntzei lotutako bi proba: euskara edo gaztelania, eta atzerriko hizkuntza). Puntuaziorik onena lortu zuten 16 ikasle izan ziren sarituak.
