Mitxintxola, urteko lehen erronka
Hamalaugarren Mitxintxola Igoeraren data eman berri du Itsas Mendi elkarteak: urtarrilaren 12an egingo dute. Izena eman daiteke jada.
Urte berria maldan gora hasiko dute Donibanen, baina ez metaforikoki, literalki baizik. Mendi lasterketen zaleak adi egon daitezela, Itsas Mendi elkarteak datorren urteko Mitxintxola Igoeraren berri eman baitu. Urtarrilaren 12an (igandearekin) izango da lasterketen urteko zurrunbiloari hasiera emango dion hitzordua.
11:00etan hasiko da lasterketa, Donibaneko Santiago plazatik abiatuko dira lasterkariak. Helmuga, urtero bezala, Mitxintxolan izango da. 332 metroko desnibelari egin beharko diote aurre partaideek, eta orotara, 3,4 kilometroko bidea osatu.
Lasterka berotzen hasteko, aurretik, 10:00etan hain zuzen, haurrekin mendi martxa egingo dute, plazatik Mitxintxolaraino ere.
Sari banaketa Arrokaundietan (Piraten Etxean) egingo dute. Txapeldunek txapela eramango dute, eta mariskada bat zozketatuko dute. Partaideei pintxo beroak eta salda emango dizkiete.
Lasterkarien motxila guztiak Piraten Etxera eramango dituzte eta bertan dutxak erabilgarri izango direla aurreratu dute antolatzaileek.
Izena emateko lotura honetara jo beharko da.
