Albaola Itsas Kultur Faktoria saritu dute, jasangarritasuna bultzatzeagatik
Albaola Itsas Kultur Faktoriak Turismo arloko Euskadi Saria jaso du, "Helmuga Arduratsu eta Jasangarria" sailean
Eusko Jaurlaritzako Turismo, Merkataritza eta Kontsumo Saileko Turismo eta Ostalaritza Zuzendaritzak “Helmuga Arduratsu eta Jasangarria” saileko Euskadi Saria eman dio Albaola Itsas Kultur Faktoriari. Aintzatespen honekin, gizarte, ingurumen eta ekonomia arloan jasangarritasuna bultzatzen duten tokiko proiektuak saritzen dira. Sari-banaketa Bilboko Bizkaia Aretoan izan zen, abenduaren 11an. Bertan, sektoreko agintariak eta saritutako enpresak bildu ziren. Hamahiru sarituetako sei gipuzkoarrak dira, tartean: Donostiako “Go Local” turismo agentzia, “La Viña” jatetxea, Minimil euskal moda marka, Choc Arte Coop txokolategia edota Goiener energia- kooperatiba.
Albaolaren kasuan, ez da lehen aldia bere ekimenagatik errekonozimendua jasotzen duena. Aurten bertan, Asturiasko “La Asociación Amigos del Museo de Anclas Philippe Cousteau” elkarteak “Pergamino Saria” eman dio, eta Nafarrotik “La almadia de oro” saria ere aitortu diote. Horretaz gain, Jaurlaritzaren aldetik oraingoan jaso duen sari bera jaso zuen 2018an, eta 2019an, berriz, “interes publikoko elkarte” gisa aitortu zuen, bere jardueraren eskuzabaltasun, altruismo, elkartasun eta aniztasun balioak azpimarratuz.
Albaola kultur turismo jasangarriaren ikur bihurtu da, euskal itsas ondarea berreskuratzeko helburuari eutsiz. Zurezko ontzi historikoak eraikiz eta itsas tradizioari lotutako ezagutza hedatuz, ingurumena, kultura eta ekonomiaren garapenean ekarpen baliotsu bat egiten ari da.
