Laguntza, «inoiz baino beharrezkoagoa»
Bixi-Bixi elkarteko kideek astebeteko egonaldia egin dute Saharan. Urteroko zereginez gain, proiektu interesgarri bezain beharrezko bat aurkeztu diote Fronte Polisarioari.
Saharan ateratako argazki bat. Bixi-Bixi elkartekoak, seigarrenez jada, Saharan izan dira. Astebeteko egonaldia egin zuten joan den astean zenbait boluntariok. Elkarteko Ixiar Goienetxeak HITZA-ri kontatu dioenez, astebete «eskas» geratzen bada ere, produktiboa oso izan da azken egonaldia, «gauza pila bat» egiteko aukera izan baitute, tartean, proiektu interesgarri bezain beharrezko baten lehen haziak landatu dituzte, datorren udaberrian loratuko direnak.
Han izan ziren «lehen egunean bezalaxe» oraindik ere laguntza ezinbestekoa dutela azaldu du Goienetxeak, atsekabez: «Beharra izugarria da, gero eta gehiago. 50 urte dira haien lurraldeetatik alde egin behar izan zutela eta desertu huts batean bizi dira. Palestinan edo Ukrainan gertatzen ari denak bigarren maila batean utzi du sahararren borroka». Laguntza, hortaz, «inoiz baino beharrezkoagoa» dela nabarmendu du Goienetxeak.
Ospitaleak, eskolak, azpiegiturak… Berritze lanetan buru-belarri aritu dira eskualdetik joan diren herritarrak. Horrez gain, bertako emakume taldeekin eta politikariekin ere egoteko aukera izan dute, eta bilkura guztiak emankorrak izan direla azaldu du Goienetxeak. Aipatutako proiektu berri horretan jarri du fokua sanjuandarrak: «Astebeterekin ezin dugula ezer konpondu konturatu gara, horregatik joan gara proiektu berri honekin. Egunerokotasunean dituzten gabezi eta hutsuneak nolabait bermatu nahi ditugu, bereziki, osasungintzan, hezkuntzan eta lanpostu bat lortzeko zailtasun handiak baitituzte». Hala, zuzeneko online arreta zerbitzu bat abiatuko dute datorren urtean. Besteak beste, osasun arreta Osakidetzatik bideratuko dela azaldu du, eta hezkuntza eskoletatik. Proiektu hori Fronte Polisarioari aurkeztu diote, eta begi onez eta gogoz jaso dutela aipatu du Goienetxeak. Proiektua fintzen ari dira orain, martxo-apirilean berriro Saharara abiatuko dira Bixi-Bixikoak, egitasmoa martxan jartzeko.
Bide batez, Oporrak Bakean egitasmoan parte hartzera deitu ditu eskualdeko herritarrak. «Tristura asko ere sentitu dugu. Batzuk aukera izaten dute hona etortzeko udan, uda baketsu eta zoriontsu bat pasatzera, baina askok ez. Atzerako bide bat hartzen ari dela berretsi dugu, okerrera egin duela. Horregatik familiak behar ditugu».
