Oiartzun Irratiak lehen Batzar Orokorra egin du asteon
Urteko balantzea egiteaz gain, aurreratu dute denboraldi berria aurkezteko 'Oiartzun Irratia GaLa' egingo dutela urtarrilaren 24ean.
Oiartzun Irratiak Batzar Orokor irekia egin zuen atzo (hilak 12) lehenengoz. Udaletxeko pleno aretoan izan zen bilkura, eta hogei lagun inguruk hartu zuten parte bertan; hala nola Oiartzun Irratiko entzuleek, saioak egiten dituzten kolaboratzaileak, zuzendaritzako kide berriak eta langileak batu ziren bertan, eta ziurtatu dutenez, “giro lasai eta atseginean” egin zuten jardunaldia.
Atzoko elkarretaratzearen helburua Oiartzun Irratiko komunitatea elkartzea zen batez ere; baina baita kideekin 2024an Oiartzun Irratiak egindako ekintzen berri ematea zein balantze ekonomikoa azaltzea ere. Hots, 2025eko egitasmoak eta aurrekontua partekatzea ere baziren bileraren helburuak.
Honakoak izan dira 2024ko ekintza nagusiak:
- Irrati tailerrak AEK-ko ikasleekin. Oiartzun Irratia ezagutzeko saio bat egin zuten lehenengo, hedabidearen historia eta funtzionamendua bezalakoak azaltzeko asmoz. Hainbat ikasle talde osatu zituzten gero, eta podcast bat sortu. Saio hori Korrikaren ingurukoa izan zen, eta sare sozialetan zabaldu zuten.
- Irratsaio berriak. Hiru saio berri estreinatu ditu irratiak 2024 honetan.
- Aitziyo. Maiatzean estreinatu zuten bertsolaritza ardatz duen saioa Kattalin Arabolazak, Peru Alijostesek eta Egiar Otegik. Bertsozale bat elkarrizketatzen dute hilean behin, eta bertso agendaren berri ere ematen dute bertan.
- Zinealdia. Azaroan estreinatu zuen Endika Loiolak saioa. Hamabostean behin zinemetan ikusgai dauden filmak lantzen ditu Loiolak, filmaren ildoa zein den azalduz eta soinu banda ere saioan txertatuz.
- Liburuak Hitz eta Pitz. Oraindik estreinatu gabe dagoen saioa da hau; berria, beraz. Herriko haur eta gazte irakurle taldeak izango dira nagusi saio honetan.
- 25. urteurren festa. Uztailaren 13ko festan “parte hartze zabala, giro alaia eta denetariko ekintzak” egon zirela zioten irratikoek. Egun horretan puzgarriak eta haurren txokoa; herri kirol desafiyua gazte eta helduen artean; entzuleei omenaldi ekitaldia; herri bazkaria; Irati Odriozola eta Joxe Leon Amigorenaren kantaldia; Kopla txapelketako finala eta sari banaketa; bingoa; Dantzal Sound eta Muxkerren dantzaldia eta Tio Teronen Semeak taldearen emanaldia izan ziren herrian. “Egun arrakastatsua izan zen; balorazio oso ona egiten dugu, bai aurre prestaketaz zein egun berean bizitakoaz. Esker ona adierazi nahi diegu modu batera edo bestera urteurren jaia antolatzen laguntzen aritu zirenei eta baita parte hartzaile guztiei ere”.
2025eko egitasmoen artean, berrikuntzak
Batzarrean urte berriko asmoak zein ziren azaldu zituzten Oiartzun Irratia osatzen dutenek, eta, besteak beste, aurreratu zuten programazio berria egongo zela, kolaboratzaile eta webgune berriarekin. Hori ospatzeko, Oiartzun Irratia GaLa egingo dute urtarrilaren 24an, Landetxeko auditorioan. 19:00etan izango da ekitaldi irekia, eta doako gonbidapena Landetxeko txarteldegian edota hemen eskuratu behar da.
Antolatzaileek aurreratu dute gehienez ordubeteko ekitaldia izango dela, eta zuzeneko irratsaio baten forma emango diotela gonbidatu, musika eta “sari mundialak” izango dituen lehiaketa batekin.
Herritar guztiak gonbidatu zituzten urtarrilaren 24ko aurkezpen ekitaldira, eta deia luzatu dute Oiartzungo eragile, elkarte eta herritar guztiei haien proposamenak, proiektuak, ekarpenak edo “dena delakoak” Oiartzun Irratiarekin partekatzeko. “Denontzat daude atek zabalik”.
