Dominguez diputatuak Don Boscoko ikasleak hartu ditu
Dominguez foru diputatuak Don Boscoko Mugikortasun Seguru eta Iraunkorreko Goi Zikloko ikasleei harrera egin dien Lurraldebusen instalazioetan.
Azahara Dominguez Mugikortasuneko, Turismoko eta Lurralde Antolaketako foru diputatua Don Bosco LHIIko Mugikortasun Seguru eta Iraunkorreko Goi Zikloko ikasleekin elkartu da gaur, hilaren 17an, Lurraldebus Gunearen instalazioetan.
Ikasleek, Lurraldebus Gunean egiten den lana ezagutzearekin batera, mugikortasun iraunkorraren ildoan Gipuzkoak dituen “erronka handiak” ezagutzeko aukera izan dute: Gipuzkoan ere garraioa denez berotegi-efektuko gasen arrazoi nagusia, “premiazkoa da lanean jarraitzea, eredu jasangarriagoak eta herritar guztientzako irisgarriagoak lortzeko, eta, horretarako, garraio publikoaren erabilera sustatzen duten politikak behar dira”. Garraio publikoko zerbitzu egokiak ahalbidetuko luke herritar gutxiagok erabiltzea autoa joan-etorrietarako, diputatuaren arabera. Gainera, kontuan hartzekoa da familia batzuek ez dutela ibilgailu pribaturik izateko baliabiderik.
Dominguezek “ondo prestatutako eta kualifikatutako gazteak” izatearen garrantzia azpimarratu du, “Gipuzkoa lurralde jasangarriago eta bizigarriago” batera bidean gazte hauek “mugikortasun-irtenbideak diseinatu, inplementatu eta kudeatu” beharko baitituzte. Ikasleei lan-merkatura sartzeko “aukera handia” izango dutela adierazteko baliatu du hitzordua.
Izaskun de Miguel Don Boscoko irakasleak ikasleek “garraio publikoko sarearen kudeaketa ezagutu ahal izan” dutela azpimarratu du, eta etorkizunean izango dituzten lan postu eta gaitasunetarako “interesgarria” iruditzen zaio.
