Neguko oporretarako egitarau oparoa haur eta nerabeentzako
Hilaren 23tik urtarrilaren 3 arte neguko oporretarako eskaintza antolatu du Errenteriako Udalak.
Errenteriako haurrek badute zer ospatu neguko opor hauetan. Izan ere, Errenteriako Udal Ludotekak egitarau zabala antolatu du hilaren 23tik urtarrilaren 3 arte.
Haurren neguko oporretako egitaraua
Hilaren 23an, astelehenean, eskulanak egingo dituzte haurrek 9:30tik 13:30ra.
Hilaren 26an, ordutegi berean, Lekuona Fabrika bisitatuko dute Ludotekako haurrek.
Hilaren 27an, Errenteria utzi eta Lasartera joango dira, Izar Park txikiparkera, hain zuzen ere. Ohi baino jarduera luzeagoa izango da, 9:30ean hasi eta 16:30ean itzuliko baitira; beraz, bazkaria eraman beharko dute.
Hilaren 28an, 9:30tik 13:30ra, sukaldaritza tailerra egingo dute.
Urtea bukatzeko, hilaren 30rako, urte zahar festa antolatu dute 9:30tik aurrera.
Urteari urtarrilaren 2an emango diote hasiera ludotekan, Niessen zinemetan The Goonies ikustera joanez.
Neguko oporretako egitaraua urtarrilaren 3an itxiko dute, eskulanak eginez 9:30tik 13:30ra.
Hilaren 9an ireki zuten izen emateko aukera, eta haurrei izen eman nahi dienak ludotekak@errenteria.eus helbidera idatzi dezake.
Baina, haurrak ez dira neguko oporretaz gozatzeko aukera izango duten bakarrak. 13 urtetik 17 urte artekoentzako ere egitarau oparoa antolatu du Udalak. Haurren egitarauan bezala, hilaren 23an hasi eta urtarrilaren 3an bukatu da neguko oporren egitaraua.
Nerabeen neguko oporretako egitaraua
Hilaren 23an, 17:30tik 20:30ra Donostiara irteera egingo dute Gaztelekuko nerabeek.
Hilaren 26an, Txuri Urdin izotz jauregian igaroko dute arratsaldea, 12:30tik 20:00etara.
Hilaren 27an, Gaztelekuko kirol txapelketa izango dute, 10:00etatik 14:00tara.
Hilaren 28rako, bezperako ordutegi berean, opari tailerra antolatu dute.
Haurren modura, urte itxiera emateko urte zahar festa izango dute hilaren 30ean, 13:30tik 17:30ra arte.
Urtarrilaren 2an, 10:00etatik 14:00etara, The Goonies filma ikusiko dute.
Oporretako egitaraua ongi ixteko, urtarrilaren 3an Costajumpera joango dira.
Hilaren 23, 26 eta urtarrilaren 3ko egitarauetarako Mugi txartela eraman beharko dute nerabeek.
