Mattin Etxebesteri harrera egin dio Oiartzungo Udalak
Euskal Herriko VI. Aurresku Txapelketa irabazi du Etxebestek, bigarrenez. Ekain Susperregi zinegotziak oiartzuar guztien izenean zoriondu du.
Ekain Susperregi zinegotzia, Mattin Etxebeste dantzaria eta Estibalitz Iturria Gipuzkoako Dantzarien Biltzarreko koordinatzailea. Euskal Herriko VI. Aurresku txapelketa jokatu zen Hondarribian azaroaren 23an, eta Gipuzkoar erara dantzatutako aurreskuarekin irabazi zuen Mattin Etxebeste dantzari oiartzuarrak. Bigarrenez lortu du garaipena, duela bi urte ere irabazi egin baitzuen.
Ekain Susperregi zinegotziak oiartzuar guztien izenean zoriondu du Etxebeste, eta herriko dantzarien maila altua nabarmendu du. “Izan ere, bi dira euskal dantzan irabazi daitezkeen titulu garrantzitsuenak: dantza soltea (binaka) eta aurreskua (bakarka), eta bietan gailendu dira Oiartzungo dantzariak”. Dantza solte txapelketa irabazi zuten duela aste batzuk Katerin Artola oiartzuarrak eta Iker Belintxon lezoarrak, eta, orain, Aurresku txapelketan gailendu da Etxebeste. “Oso urte gutxitan lortu dituzte bi garaikurrak herri bereko dantzariek”, diote udaletik. Oiartzungo Udalean jasoko dira bi oroigarriak, hurrengo edizioak ospatu arte.
