Hiru milioi eurotik gorako proiektuak egikaritzea aurreikusi dute
Oiartzungo Udalak zenbait proiektu aurkeztuko ditu EDIL planen bidez Europar Batasunak eskualdeen garapenerako ematen dituen diru laguntzetara.
Oiartzungo Udalak jakitera eman duenez, zenbait proiektu aurkeztuko ditu EDIL planen bidez Europar Batasunak eskualdeen garapenerako ematen dituen diru laguntzak lortzeko. Proposamen hori Oarsoaldeko beste hiru udalerriekin osatu dute, eta, otsaileko osoko bilkuran aho batez onartu zituzten Oiartzunen egin nahi dituzten inbertsioak. Zehaztu dutenez, hiru milioi eurotik gorako proiektuak egikaritzea aurreikusi dute; hala nola, Altzibarko gune estalia (1.500.000 euro); bidegorriko lotura berriak egitea eta zati ezberdinak konpontzea (1.000.000 euro); Altzibarko Klarene plaza inguruan dagoen eraikin bat eraberritu eta Zorrolako trenaren inguruko interpretazio gune txiki bat egitea (200.000 euro), eta, herriko komertzio txikiak diruz laguntzeko egitasmoa (175.000 euro).
Joana Mendiburu alkateak zehatu zuen hautatutako proiektuek herri garapen iraunkorra sustatuko dutela ingurumenaren, ekonomiaren eta gizartearen ikuspegitik. “Herritarren bizi kalitatea hobetuko duten egitasmo hauek 2025-2029 urte bitartean gauzatzeko izango dira, eta diru laguntza lortuko bagenu inbertsioaren %40 finantzatuko ligukete”. Alabaina, bestela ere udalak aurkeztutako proiektuak egiteko asmoa baduela azpimarratu zuen. “Proiektu horiek denak behar duten inbertsioa jasota dugu gure aurrekontuetan, eta diru laguntza lortuko bagenu jarritako diruaren %40 errekuperatuko genuke proiektu gehiago egin ahal izateko”. Oarsoaldeko lau udalerrien artean 14,5 milioi euroko aurrekontua duen inbertsio plana osatu dute.
Oiartzungo Udalaren 2025-2027 Diru laguntzen Plan Estrategikoaren lehen aldaketa ere onartu zuten EH Bilduko zinegotzien aldeko botoekin. Aipatu dutenez, Alternatiben Oihartzuna elkarteari 20.000 euro emango dizkiote “burujabetzen bidean komunitatearen garapena eta herritarren partaidetza eta elkarlana sustatzeko”.
Lau hautetsi jeltzaleak, alabaina, abstenitu egin ziren; Rafael Bergaretxek “lanketa konpartituago” bat eskatu zuen. “Burujabetasuna oso kontzeptu baliagarria izan daiteke plano indibidualetik nazionaleraino, baina behar du azterketa eta gogoeta partekatuagoa eta sakonagoa. Badaramatzagu urte batzuk lanketa hauek herrian entzuten, baina lehen aldia da Oiartzun Burujabe proiektua foro bezala planteatuta ikusi duguna. Zerbait konpartituagoa eta definituagoa izan behar du, denon artean landuagoa”.
Era berean, Ibon Mitxelena Burujabetzen zinegotziak lanketa 2017an abiatu zela azaldu zuen, baita 2023an, helburuetan, “koska bat gora” egin zutela ere. “Oiartzunen burujabetza terminotan burutzen ziren hainbat proiektu bazirela ikusirik, guztiak artikulatuko dituen dinamika batekin amesten hasi ziren. 2023an hasitako proiektuan eboluzio bat egon da. Bost arlo lantzea adostu da (elikadura; energia; euskara eta kulturartekotasuna; zaintza eta kultura) eta mahai horiek osatuta daude herriko eragileekin, herritarrekin eta udalarekin”.
Amaitzeko, nabarmendu zuten prozesua “sekulako martxa” hartzen ari dela, eta baita herritarren parte hartzea errotzen ari dela ere. “Beharrezkoa dugu herritarrekin hitzarmen bat egin eta euren ahotsa indartsu eta oso presente egon dadin”, gehitu zuen.
