Bizirain Txikiko patioa eraldatu dute
Bizirain Txikiko (Beraun) patioa irisgarriagoa eta atseginagoa da orain: sarbidea hobetu eta jolas-gune berdea sortu dute, material bigunez osatuta. Proiektua udal ikastetxeetako jolastokiak eraldatzeko programaren baitan dago.
Bizirain Txikiko patioa eraldatzeko lanak amaitu dituzte. Beraungo haur eskolako eraikineko irisgarritasuna hobetu dute, sarreran aldaketa nabarmenak eginez; eta patioari protagonismo handiagoa eman diote, jolas-gune berde eta atseginagoa sortuz: horretarako, material bigunak erabili dituzte (zurezko enborrak, hondarguneak…). Ikastetxearen kanpoaldean, oinezkoen pasabidea ere lekuz aldatu da, irisgarria eta segurua izan dadin. Lanon helburua, espazio fisikoa hobetzeaz gain, “jolasteko aukerak dibertsifikatu eta haurren eta hezkuntza komunitatearen artean dinamika berriak zein harreman bidezkoagoak” sortzea izan da. Proiektura 218.000 euroko aurrekontua bideratu dute.
Ekimena Udalak herriko ikastetxe publikoen jolastokiak eraldatzeko abiatutako programaren baitan burutu da, Bizirain Txikin egindakoa lehen interbentzioa izan delarik.
2022-2023 ikasturtean Udalak partaidetzazko prozesu bat abiatu zuen jolasguneak nola eraldatu erabakitzeko: hiru saioko prozesu bat egin zuen komunitate bakoitzeko zuzendaritza, irakasle, guraso, eta jangelako arduradun eta atezainekin. Aizpea Otaegi alkateak eta Itsaso Cruz Hezkuntza zinegotziak prozesua bera azpimarratu eta balioan jarri nahi izan dute, modu batera edo bestera hezkuntza komunitatearen parte diren langile eta eragile guztiak kontuan hartu baitira.
Beste hainbat eskolatan ere esku hartzeak egiteko lanean ari da Udala. Hurrengo lanak Olibeteko Koldo Mitxelena ikastetxean izango direla aurreratu dute.
