Etxez etxeko zerbitzuko langileek elkarretaratzea egingo dute bihar
ELA eta LAB sindikatuek salatu dute Matia Fundazioa Pasaiako etxez etxeko langileen hitzarmen berriaren negoziazioa atzeratzen ari dela.
ELA eta LAB sindikatuek deituta, Pasaiako etxez etxeko zerbitzuko langileek borrokari helduko diote, beste behin, eta zehaztu dutenez, bihar, –hilak 21, ostirala– 15:00etan, elkarretaratzea egingo dute Trintxerpeko alkateordetzan.
Pasaiako etxez etxeko langileen hitzarmen berriaren negoziazioak hasi zirenetik denbora bat pasa dela eta, sindikatuek salatu dute Matia Fundazioa “negoziazio prozesua atzeratzen” ari dela. Udalak eskaintzen duen zerbitzua publikoa izan behar litzakeela aldarrikatzen dute, aldi berean, langileek; “zerbitzu hau kanpoko enpresa bati azpikontratatzeak langileak eta euren bizi baldintzak prekarietatean mantentzea eragiten du”, diote.
Era berean, publifikazioa gauzatu bitartean udalari eskatzen diote etxez etxeko zerbitzuko langileen lan baldintzak udaleko langileen lan baldintzetara parekatzea. Horretaz gain, Matia Fundaziori eskatzen diote udalak parekatze horretarako ematen duen dirua euren hitzarmenean jaso dezatela.
Aipatutako aldarriak borrokatzeko, Pasaiako etxez etxeko langileak mobilizazioekin hasiko dira, eta bihar izango dute lehen deialdia.
