"Euskaltzaleon kasuan, zer da hunkigarriago Korrika baino?"
Ander Iriarte oiartzuarrak euskararen auzi guztiak mahai gaineratuko ditu Korrika ardatz izango duen dokumental batean. Dirua biltzeko kanpaina abiatu dute.
Korrika Oiartzunen, 2024an. Ander Iriartek Jalgi hadi! dokumentala zuzenduko du Mirokutana ekoiztetxearekin eta AEK zein Korrikaren laguntzarekin. 2027an grabatuko dute, baina diru bilketa martxan jarri dute dagoeneko.
Iriarteren hitzetan “euskara berriro ere bidegurutze batean dago”, eta hori euskaltzale guztiek egin duten irakurketa bat dela sinistuta dago. “Bigarren berpizkundea deitzen zaionak, 60-80. hamarkadetakoak alegia, ez du gehiagorako ematen, eta berdin jarraitzen badugu atzera egingo dugu”. Jalgi hadi! lanarekin mahai inguru bat sortu nahi izan du Iriartek, iruditzen baitzaio “bakoitza bere pentsamenduekin dagoela bere unibertsoan, egoera bere kabuz aztertzen, eta guk sortu nahi izan dugu tresna bat dokumental baten bidez zeinak jarriko dituen mahai gainean euskarak gaur egun dituen auzi guztiak”. Hortaz, iritzi guztiak plazaratuko dituzte ikus-entzunezkoarekin.
Dokumental “oso intelektuala” izan daitekeela aurreratu du oiartzuarrak, baina azken urteetan jorratu dituen “gai gogorrekin” ikasi du burua eta bihotza uztartu behar direla. “Burua badakigu zer den, baina euskaltzaleon kasuan zer da hunkigarriago Korrika baino?”, gehitu du. Beraz, AEK-ren eta Korrikaren laguntzarekin, Korrikan bidaiatzen doazen heinean euskararen kontuak ukitzean izango da egitekoa.
Korrikaren prozesu guztia grabatuko dute dokumentalean; azpimarratu du jende askok hartzen duela parte ekimenean, baina “askok ez dakite nola sortzen den, nola diren bilerak…”. Hortaz, Korrika bera barrutik ezagutzeko aukera izango da. “Korrikak berak mahai gainean jartzen ditu Euskal Herrian oraintxe bertan euskararen inguruan ditugun auzi guztiak: hiru lurraldeak ukitzen ditu, adin demografiko guztiak, instituzioak, publiko eta pribatua, migrazioa, mugak… Korrikaren bidez hitz egin nahi dugu euskararen kontu garrantzitsu guztien inguruan. Korrikak dena batu dezake”.
2027. urtean grabatuko dute ikus-entzunezkoa, eta urte bereko Donostiako Zinemaldian estreinatu nahi dute. Hala ere, orain, pausoz-pauso ari dira lanean. “Momentu honetan garrantzitsuena herriaren babesa lortzea da; euskalgintza herritik atera da beti, herritik biziraun du, eta guk proiektua finantzatzeko herritik hasi nahi genuen”.
