Adierazpen instituzionala Pasaiako etxez etxeko langileen mobilizazioen harira
Pasaiako etxez etxeko langileek mobilizazio eta aldarrikapen aroa iragarri dute. Horien harira, Pasaiako Udal Gobernuak adierazpen instituzional bat argitaratu du.
Pasaiako etxez etxeko langileek mobilizazio eta aldarrikapenak iragarri dituzte. Horien harira, Pasaiako Udal Gobernuak adierazpen instituzional bat argitaratu du. Hona hemen puntuz puntu udalak esandakoak:
-
Udala prest egon da agintaldi hasieratik etxez etxeko langileen baldintzak hobetzeko. Zehazkiago, honakoa proposatu dugu:
-
Langileen soldata %12 handitzea urte bakar batean.
-
Zerbitzuaren ordu kopurua 3.300 ordutan handitzea urtebetean, horren kalitatea bermatzeko eta erabiltzaile bakoitzarekin izan daitekeen arreta-denbora (eta beraz, langileen kontratuak) handiagoak izan daitezen.
-
Horrez gain, konpromisoa hartu dugu hasieratik langileei beharrezko formakuntza eskaintzeko bai euskararen arloan eta baita lanpostuei dagozkien prestakuntza espezifikoetan ere.
-
Zerbitzuaren publifikaziorako aukeren azterlan bat egiteko konpromiso garbia adierazi dugu hasieratik, eta berresten dugu.
-
-
Hasieratik garbi adierazi dugu hobekuntza hauek gauzatu ahal izateko ezinbestekoa zela langileek hitzarmena sinatzea enpresarekin, hori baita modu bakarra bermatu ahal izateko udalak aurreikusitako igoera ekonomikoek isla zuzena izango zutela langileen soldata nahiz aipaturiko beste alorretan ere. Idatzizko konpromiso hori gabe, Udalak ezin berma dezake planteatutako hobekuntzek isla izango dutenik etxez etxeko langileen egoeran.
-
Udalak ezin du ezinbesteko zerbitzu hau berriro kontratatzeko prozedura atzeratu, horrek suposatuko lukeelako etxez etxeko zerbitzua bertan behera gelditzeko arriskua, Pasaiako bizilagun zaurgarrienengan zuzeneko kalteak sortuaz.
-
Testuinguru horretan, eta azken bileran langileen eta enpresaren arteko akordiorik ez zegoela azaleratu zenez gero, Udalak zerbitzuaren kontratazioa (lizitazioa) 6 hilabeterako egitea proposatu du, 2 urterako beharrean. Proposamen hori mahai gainean jarri da, hain zuzen, aukera emateko langileei eta enpresari hitzarmena sinatzeko negoziaketekin aurrera egiteko, eta hurrengo lizitazioan aipaturiko hobekuntzak txertatu ahal izateko.
-
Udalak prestutasun osoa izaten jarraitzen du progresiboki Pasaiako etxez etxeko langileen lan-baldintzak duintze aldera hobekuntza kuantitatibo eta kualitatiboak martxan jartzeko, orain arte adierazi duen bezala. Zentzu horretan, eta hobekuntza horiek lehenbailehen gauza daitezen, Udaletik publikoki prest agertzen gara berriro ere langileen eta enpresaren artean behar diren bitartekari lanak egiteko, betiere etxez etxeko langileen mesedetan.
