Etxez etxeko langileen prekarietatea salatuz, elkarretaratzea egin dute
Pasaiako etxez etxeko langileen prekarietatea salatzeko elkarretaratzea egin dute gaur, Trintxerpeko alkateordetzan, 15:00etan, ELA eta LAB sindikatuek deituta.
Pasaiako etxez etxeko zerbitzuko langileek hainbat hilabete daramate Matia Fundazioarekin haien hitzarmena negoziatzen, baina enpresak erakutsi duen negoziaziorako “borondate erreal eza” dela-eta, mobilizazioak deitu dituzte. Lehen elkarretaratzea gaur izan dute, ELA eta LAB sindikatuen babesarekin, Trintxerpeko alkateordetzan, arratsaldeko 15:00etan.
Zerbitzuak publikoa izan beharko lukeela aldarrikatu dute, eta Udalak hori onartu duen arren, kanpoko enpresa batekin azpikontratua daukala salatu. Egoera hori hala mantentzen den artean, langileek udalari ardura hartu eta haien lan baldintzak hobetuko dituen baliabideak jartzeko eskatu diote, udaleko langileen artean baldintzak berdindu ditzaten.
Hori dela-eta, agerian utzi nahi izan dute etxez etxeko langileek pairatzen duten diskriminazioa: “Martxoak 8 pasa berri den honetan, zaintza esparruan lan egiten dugun emakumeok pairatzen dugun prekarietatea nabarmena dela argi geratzen da”. Bestalde, enpresari “negoziaziorako borondate erreala” eskatu diote.
“Zaintzarekin negoziorik ez!” leloari eutsiz, haien aldarrikapenak lortu bitartean mobilizazioetan jarraituko dutela gaineratu dute.
