Ongizatea sustatzeko, Bitartekaritza Zerbitzua
Oiartzungo Udalak Bitartekaritza Zerbitzua emango du herritarren arteko liskarrak konpontzen laguntzeko. Prozesu konfidentziala eta doakoa da, eta Udaltzaingoak kudeatzen du.
Ezker-eskuin Lizeaga, Mendiburu, Garagarza eta Lasa. Leire Perlines Oiartzungo Udala herritarren bizikidetza hobetzeko pausuak ematen ari da zenbait alderditan, eta, berriki, herritarren arteko liskarrak konpontzeko zenbait tresna txertatu ditu udal taldeak.
Olaia Lasa Ongizate zinegotziak azaldu du, herrian, esanguratsuak ez badira ere, “liskar txiki asko” sortzen direla, eta Bitartekaritza Zerbitzu honen helburua dela “liskar horiek guztiz korapilatu baino lehen edota epaitegietara iritsi baino lehen horiei konponbide bat bilatzea”. Lasak, bestalde, azaldu du korapilatze horiek ekar dezaketela egunerokoan korapilo horrekin etengabean bizi behar izatea; hortaz, “pertsona horien bizi kalitatea hobetzea” ere bada zerbitzu honen egitekoa.
Gertakari horien aurrean, beraz, Bitartekaritza Zerbitzua martxan jartzea erabaki zuen udal taldeak herritarren eguneroko gatazka txikiak konpondu eta bizikidetza arazoei aurre egiteko. “Dagoeneko oso judizializatuta dagoen gizarte bat gehiago ez judizializatzeko” modua dela sinistuta daude.
Xabi Garagarza da Udaltzainburua, eta kontatu du betidanik saiatu direla modu natural batean bizilagunen artean adostasun bat lortzen. Orain lanketa hori egituratu eta zerbitzu bihurtzeko aukera ikusi dute, eta zerbitzua arrakastatsua izan dadin beharrezkoak diren formakuntza zein espezializazio saioak egin dituzte. Gauzak horrela, zerbitzua egonkortu eta ofizialki eskaini nahi diote herriari.
Borondatezko zerbitzua
Ideia finduta, bitartekari lanetan ari denaren bila hasi ziren, eta Xanet Lizeaga izendatu zuten bitartekari moduan. Garagarzak nabarmendu du Vila Realeko udaltzaingoa eredu dela Europa mailan bitartekaritzari dagokionean; hortaz, hango egoitzara joan zen Lizeagarekin formakuntza jasotzera. Lizeaga bera formazio saio gehiago ari da egiten.
Urtarrilaren 1ean hasi zen Lizeaga bitarketari lanetan, eta gaur-gaurkoz bi espediente amaituta, beste bi hasita eta bosgarren bat hasteko zain dago.
Zerbitzua borondatezkoa da, eta herritarrek 688 71 62 40 telefono zenbakira deituta eska dezakete laguntza. Hala ere, Udaltzaingoak ikusten badu liskar batean esku har dezakeela prozesua errazteko eta korapiloa ez areagotzeko, Lizeaga bera jarriko litzateke herritarrekin harremanetan. Bigarren kasu horretan, Lizeagak lehenbizi alderdietako bati deituko lioke, eta azaldu prozesuak zertan datzan. Lehenak onartuko balu, bigarrenarekin jarriko litzateke harremanetan. Bitartekaritzako prozesu bat abiatzeko bi alderdiek egon behar dute ados.
Garagarzak gehitu du edozein momentutan alderdietako batek ikusten badu ez dagoela eroso edo ez duela jarraitu nahi, bertan behera uzten dela prozesua.
Adostasuna bilatzea helburu
Era berean, argitu dute Udaltzaingoak ezingo duela bitartekaritza zerbitzua eskaini liskar bat aurrez judizializatuta baldin badago, ezta familia baten barruko liskarra bada ere. “Gatazka zibileko bitartekaritza lanak egin ditzakegu guk, bizikidetza arazoak, alegia”, jarraitu du Udaltzainburuak.
Gatazkak eta liskarrak epaitegietara eramateak irabazle bat eta galtzaile bat egotea suposatzen du, “horrelako prozesu batetik ez da harreman onik ateratzen. Bitartekaritza batekin euren arteko harremana askoz hobea da”, hartu du hitza Lizeagak.
Finean, adostasun batera heltzen lagunduko die zerbitzu horrek herritarrei. “Guk ezin ditugu soluzioak proposatu ezta inposatu ere, baina ez aurrera ez atzera daudenean egoera bideratzen lagun dezakegu”, gehitu du Garagarzak.
Prozesua konfidentziala eta doakoa dela nabarmendu du Lasak. Saioak, ondorioz, leku zehatz batean, herritarrei egokitutako ordutegi batean eta udaltzainen uniformerik gabe egiten dituzte
