San Juanaren txukabonba eraikitzen hasi dira Albaolan
Prozesu guztia bezala, piezaren eraikuntza jendaurrean egingo dute, eta artisauen lana ikusteko aukera izango da bihar –hilak 29–.
Albaola Itsas Kultur Faktoriak jakitera eman duenez, San Juanaren txukabonba “XVI. mendeko itsas teknologiari buruz dagoen ebidentzia fisiko bakarrenetakoa” da. Sistema honek iragazketen ondorioz kroskoan sar zitekeen ura ateratzea zuen helburu.
Albaola eraikitzen ari den erreplika guztietan garaiko materiala erabiltzen dute, beraz, hala izango da txukabonbaren kasuan ere. Prozesu horretan zazpi metroko luzera duen pago enbor bat zulatu behar dute luzetara, 12 zentimetroko diametroa duen zulo batekin; koilarazko barautsez hornitutako barrena bat –XVI. mendean erabiltzen zirenen antzekoa– diseinatu eta eraiki dute horretarako.
Bonba horren eraikuntzarekin garai hartan itsasontziak nola eraiki zein mantentzen ziren ulertzeaz gain, itsas historia berreskuratzeko urpeko arkeologiak duen funtsezko papera indartuko dute Albaolakoek.
Pieza hau “funtsezko” elementua da itsas zabaleko itsasontziaren segurtasunerako eta eraginkortasunerako, eta, azpimarratu dutenez, “Albaola Itsas Kultur Faktorian fideltasun osoz erreplikatuko da, Red Bayko (Kanada) saskarrean aurkitutako jatorrizko bonbaren analisitik lortutako ezagutzan oinarrituta”.
Eraikuntza prozesu hau jendaurrean egingo dute, eta artisau lana ikusteko aukera izango da bihar –hilak 29–, apirilaren 5ean –larunbata– eta baita maiatzaren 14ra arteko asteazkenetan ere.
