Liburutegiaren eraldaketa prozesuaren bigarren saioa egin dute
Bigarren saioa honetan planoak aztertu eta ulertzeaz gain, zarataren eta jardueraren araberako espazioen banaketa egin dute.
Bazen behin liburutegi bat prozesua Oiartzungo liburutegi eredua modu kolektiboan birpentsatu eta diseinatzeko prozesua da. Oiartzungo Udalak eta Ku-ku Haur eta Gazte Literatur Ekimenak jarri dute martxan ibilbide berri hori, eta larunbatean prozesuaren bigarren parte hartze saioa egin zuten.
Bigarren hitzordu horretara herriko kolektibo zein elkarte ezberdinetako 22 ordezkari bertaratu ziren, eta batez ere ordura arte egindako ibilbidea izan zuten hizpide. Karmele Mitxelena Ku-ku Haur eta Gazte Literatur Ekimeneko kidea da, eta kontatu du bigarren saio horretan nolabait prozesuaren “erdiko puntuan” zeudela, hiru saio egingo baitituzte orotara. Hortaz, orain arteko emaitzak aztertu zituzten, bai eta ordura arte herritarrek eta kolektibo ezberdinek zer esan duten ere.
Arkitekto bat dute prozesuan bidelagun, eta haren lana ere mahai gaineratu zuten; izan ere, planoen bisita egin zuten irudiak “ondo ulertzeko”, eta ezagunak zaizkien liburutegiko espazioak identifikatu zituzten gero. Mitxelenak dioenez, liburutegia “espazio mugatua” da, eta denentzat leku bat izatea “ezinezkoa” denez, espazioak zarataren eta jardueraren arabera sailkatu zituzten; hartara, behin liburutegiaren elementu guztiak ordenatu eta taldekatu zituzten planoen gainean. Alabaina, Ku-ku Haur eta Gazte Literatur Ekimeneko kideak argitu du prozesua ez dela amaitu, maiatzaren 24an izango baita bide horren hirugarren eta azken parte hartze saioa.
Gauzak horrela, hirugarren saio horretarako bigarren saioan egindakoa ordenatuko dute jakitun izanik erantzun gehiago iritsiko direla, gaur gaurkoz hezkuntzaren alorrean ari baitira lanean. Hala ere, maiatzaren 24ra plano “nahiko itxiak edo behintzat espazio aldetik dena edo gehiena kokatuta” izan nahi dute, eta gutxi gora beherako proposamen bat eramango dute “nahiz eta saio horretan aldaketak egon daitezkeen”.
