Egiar Otegi Torresek irabazi du Gipuzkoako Eskolarteko Txapelketa
Saioa irabazita, Gipuzkoako ordezkaria izango da Euskal Herriko finalean. Saioaren biharamunean HITZArekin izan da txapelduna.
Egiar Otegi Torres txapelarekin. Bertsoa.eus Azpeitian jokatu zuten Gipuzkoako Eskolarteko Txapelketako finala, eta Egiar Otegi Torres oiartzuarrak jantzi zuen txapela; hortaz, Gipuzkoako ordezkaria izango da Euskal Herriko finalean.
Otegik sorpresaz hartu zuen txapela, baina oro har saioan “oso gustura” ibili zela adierazi dio HITZAri. “Lehenagotik afaria izan genuen, eta ezagunak nituen kantukide gehienak. Afarian giro polita sortu zen”, jarraitu du. Hala ere, onartu du saiora “nekatuta” iritsi zela. Kantuan hasterako 22:30ak ziren, eta beraz, “ahalik eta hobetoen” abesten ahalegindu zen oiartzuarra. Are, “esperantza handiegirik ez nuen”, nabarmendu du.
Horretaz gain, kantuan hasi eta lehen ariketa “kostatu” egin zitzaion gazteari, baina gero, tarteko ariketetan, zortziko handian eta zortziko txikian, kasu, “gustura” ibili zen. “Kideak ere ondo ikusi nituen, eta egia esan lanak bukatu genituenean ez nuen esperantzarik irabazteko, ezta bigarren geratzeko ere. Besteak oso ondo aritu zirela ikusi nuen, eta eurak pasako zirela pentsatzen nuen”.
Alabaina, saioa amaitu eta Ion Zalduak jantzi zion Otegiri txapela. Irabazleak, haatik, badu zerbait azpimarratu nahi duena: “Txapel batek ez du esan nahi ni besteak baino hobea naizenik. Beste egun batean agian beste norbaitek eramango luke txapela. Hori iruditu zitzaidan behintzat”.
Amaieran, ordea, aitortu du gehiago abesteko gogoz geratu zela.
Txapeldunaren agurra ikusteko, egin klik hemen.
