Literaturarekiko zaletasunak elkartu ditu gaztetxoak
Errenteria-Orereta, Oiartzun eta Zarauzko gazte literatur zaleen lehenengo topaketa egin dute Oiartzungo dorretxean.
Errenteria-Oreretan, Oiartzunen eta Zarautzen gazte literatur zaleen taldeak dituzte; ohiko irakurle talde modukoak dira horiek, eta irakurketa eta idazketa tailerrak egiten dituzte, nahiz eta herri bakoitzean formatua ezberdina den. Oiartzunen eta Zarautzen hilabetean behin elkartzen dira, eta lehenengoaren kasuan bi talde daude, DBH 1 eta 2koak batetik eta DBH 3 eta 4koak bestetik. Errenteriaren kasuan, aldiz, astero elkartzen dira irakurzaleak arte eskolak eskaintzen duen Hitza ikastaroan. Kasu horretan ere adinka daude banatuta ikasleak, baina Olatz Mitxelena topaketetako antolatzaileak zehaztu du Oreretan gehiago egiten dituztela idazketari eta hitzari begirako ariketak. Bertako dinamizatzailea Eider Perez da, Nerea Loiola Zarauzkoa, eta Olatz Mitxelena, Goiatz Labandibar eta Alaia Martin, berriz, Oiartzungoak.
Aipatutako herrietako gazte literatur taldeetako dinamizatzaileek bazuten bata bestearen berri, eta “ohikoa ez denez izaten DBHko haurrei kontu hauen berri ematea”, bilera bat egitea erabaki zuten elkarrekin harremanetan jartzeko eta zerbait bateratua egiteko. Helburua argia zen: gazteek jakitea ez daudela bakarrik eta herri gehiagotan ere badaudela horrelako talde gehiago, eta, noski, gazteek eremu berdinera hurbiltzen den beste herrietako jendea ezagutzea.
Hilaren 5ean elkartu ziren Oiartzungo dorretxean DBH 1 eta 2ko 11 gazte eta DBH 3 eta 4ko beste 10-11, eta ezagutza jolasa egin zuten lehenbizi. Tailerrak egin zituzten gero, eta horretarako bertaratutako gazteak bi taldetan banatu zituzten. Hiru tailer egin zituzten orotara, eta eguerdi partean berriz elkartu ziren denak landu zutena elkarbanatzeko. Are, Mitxelenak kontatu du batzuk ahoz goran irakurtzera ere animatu zirela. Arratsalderako bisita berezi bat zuten antolatuta, Olatz Salvador abeslari eta musikariarena hain zuzen, eta bere sormen prozesuaz, abestiez eta ibilbideaz galdetu zioten gazteek. “Giro goxo eta ederra sortu zen”, gehitu du Mitxelenak.
Egunari dagokionean, “antolatzaile zein gazteei iruditu zitzaigun oso egun polita izan zela eta oso arin pasa zitzaigula. Antolaketa lanak aurrez erraz egin genituen, eta eguna bera ere oso modu politean joan zen. Gazteak proposamenei heltzeko gogoz zeuden, eta, noski, errepikatzeko moduko esperientzia izan da”, jarraitu du.
Antolatzaileen hitzetan, gisa horretako ekimenek lortzen dute bistaratzea sortzaileak badaudela; egin egin behar direla sortzaileak, eta horiei aukerak eman behar zaizkiela. “Polita da horretan dabilen jendea ezagutzea eta elkarren berri izatea”, amaitu du.
