Etxeratze bideari emango diote garrantzia aurtengo Etxera egunean
Maiatzaren 4an (igandea) izango da Oiartzungo Etxera eguna, eta egitaraua aurkeztu dute dagoeneko. Bazkariko txartelak salgai daude.
Oiartzungo Sarek antolatuta, Etxera eguna ospatuko dute maiatzaren 4an (igandea). Etxeratze bidea, 3,7km-ko ibilbidea egingo dute egunean zehar, zenbait txandatan: 11:00, 11:15, 11:30, 11:45 eta 12:00. Bide horretan presoen etxeratzeko bidearen nondik norakoak azalduko dituzte hiru geldialditan, eta amaieran bideari “behin betiko” zigilua jarriko diote. Antolatzaileek nabarmendu dute ibilbidea adin eta erritmo guztientzat egingarria dela.
Aldarrikapena eta jaia uztartzeko eguna izango dela nabarmendu dute: “Etxeratze bidean urratsak eman ditugu, baina guztiak etxean izan arte ez du bideak amaierarik izango, eta lanean jarraituko dugu”.
Iazko Etxera egunean konponbideko giltzari eman zioten garrantzia; aurtengoan, berriz, etxeratze bideari.
14:30ean herri bazkaria egingo dute plazan, eta barazki edota haragi paella egongo dira aukeran. Txartelak salgai daude dagoeneko Kastron eta Txokolategian; haurren txartelek 8 euro balio dute eta helduenek 12 euro. Giroa alaitzeaz Andoni Ollokiegi arduratuko da 16:00etatik aurrera egingo duen emanaldiarekin.
