Markel Galdos Cardeñosoren omenez izango da Bizardiaren ibilaldia
Igandean (hilak 27) egingo dute Bizardia elkartearen XLIV. ibilbidea. Gurutzeko frontoitik hasiko dute aurtengo bidea, 7:30ean.
Markelen omenez Gurutzen jarritako monolitoa. Bizardia elkarteak XLIV. ibilaldia egingo du hilaren 27an, eta aurtengoa “berezia” izango dela azpimarratu dute antolatzaileek, Markel Galdos Cardeñosoren omenez izango baita.
7:30ean irtengo dira Gurutzeko frontoitik bidea egingo dutenak, eta bidegorri berrian barrena Aldako baserritik joan eta Urkabera joango dira. Arragua eta Leroy Merlin atzean utziko dituzte gero, eta Lezon sartzeko muga Bakardaiztegi baserrian zeharkatuko dute.
Goraka egingo dute jarraian ibiltariek Sagastiko harrobira iritsi arte, eta handik Santio bidearekin batera Txartikutik gorago dagoen bidegurutzera arte egingo dute oinez. Kosta aldera egingo dute handik, Mitxintxola inguratu eta Londreseko aztarnak bisitatu ondoren Egiazko Kaskura joango baitira. Gaintxurizketara igaroko dira jarraian, eta segidan, Erain Ikastetxetik eta Maldaburutik aurrera eginda Oiartzunen sartuko dira berriz. Usategieta, Arkaleatze eta Bizardia lirateke azken pausuak.
Antolatzaileek uste dute ibiltari azkarrenak lau ordu inguruan egingo dutela bidea, eta lasaienak, aldiz, sei orduan. Hala ere, ibiltari berriei bertaratzeko deia egin diete, “igande goiz polit bat pasatzeko ez baitago plan hoberik”.
